Ուիթկոֆը հայտարարել է, որ Թրամփը վերջնագիր է ներկայացրել Կիևին ու Մոսկվային՝ պահանջելով ուղիղ բանակցություններ

Սպիտակ տան ավագ խորհրդական, նախագահ Դոնալդ Թրամփի հատուկ բանագնաց Սթիվ Ուիթկոֆը Breitbart News-ին ասել է, որ հույս ունի՝ շուտով տեղի կունենա խաղաղության գագաթնաժողով, որտեղ Ուկրաինայի նախագահ Վլադիմիր Զելենսկին և Ռուսաստանի նախագահ Վլադիմիր Պուտինն անձամբ կհանդիպեն՝ Ուկրաինայում պատերազմի ավարտի շուրջ բանակցելու համար։

«Կարծում եմ՝ դա լիովին հնարավոր է»,- ասել է նա Զելենսկի-Պուտին խաղաղության գագաթնաժողովի հնարավորության մասին։

Ինչ վերաբերում է բանակցություններում ԱՄՆ-ի ներգրավվածությանը, ամերիկացի պաշտոնյան նշել է․ «Կարծում եմ՝ եթե Միացյալ Նահանգները հրաժարվի այս հակամարտությունից, այլ կերպ ասած՝ չցանկանա ներգրավվել դրանում և ասի՝ սա իմ պատերազմը չէ, դա վատ արդյունք կլինի բոլորի համար։ Կարծում եմ՝ ռուսներն իսկապես ցանկանում են խաղաղ կարգավորում, և երկու կողմերն էլ փորձում են հասկանալ, թե դա ինչ է նշանակում իրենց համար։ Մեր գործն է՝ նրանց մի սենյակում տեղավորել և ցույց տալ, որ խաղաղ կարգավորման այլընտրանքները վատ են բոլորի համար»։

Ուիթկոֆի պնդմամբ՝ այս պատերազմը չէր լինի, եթե Թրամփը Սպիտակ տանը լիներ 2022 թվականին, երբ Ռուսաստանը ներխուժեց Ուկրաինա:

«Լուծումները գործում են, երբ կան ուղիղ բանակցություններ։ Մենք պետք է ուկրաինացիներին և ռուսներին նստեցնենք մեկ սեղանի շուրջ։ Պետք է բոլորին ստիպենք մտածել, որ այս խնդիրը լուծելու պատասխանատու ճանապարհը դիվանագիտական ​​լուծումն է։ Եթե դուք՝ Ռուսաստան, դա եք ուզում, եթե դուք հավատում եք այս պատերազմի ավարտի դրական կողմերին ձեր հասարակության համար, և դուք՝ Ուկրաինան, նույնպես դա եք ուզում, մենք պետք է ձեզ ֆիզիկապես տեղավորենք մի սենյակում։ Մենք առաջարկում ենք երկու կողմերի միջև ուղիղ բանակցություններ՝ որքան հնարավոր է շուտ»,- ասել է ԱՄՆ նախագահի բանագնացը։

Նա, միաժամանակ, շեշտել է՝ Դոնալդ Թրամփը «վերջնագիր է ներկայացրել» երկու կողմերին․ նրանք պետք է առաջընթաց գրանցեն երկարատև խաղաղության հարցում, հակառակ դեպքում՝ ԱՄՆ-ը կհեռանա։

Ինչ վերաբերում է քննարկվելիք հարցերին, ըստ Ուիթկոֆի՝ դրանք ներառում են Ուկրաինայի տարածքի հետ կապված մանրամասներ, ներկայում անջատված կարևորագույն ատոմակայանը և Ուկրաինայի մուտքը կարևոր ջրային ուղիներ։ Նա նշել է, որ Ուկրաինայում ներկայում վիճարկվում են հինգ շրջաններ՝ երկուսը Ռուսաստանի խիստ վերահսկողության, իսկ երեքը՝ Ուկրաինայի հետ խառը վերահսկողության տակ, իսկ Զապորոժիեի ատոմակայանը «փոքրիկ գոհար» է իր արտադրած էլեկտրաէներգիայի քանակության պատճառով և ներկայում «այդ քննարկման մեծ մասն է կազմում»։

Հիշեցնենք, որ 2025 թվականի փետրվարից ի վեր Ուիթկոֆը երեք անգամ այցելել է Ռուսաստան՝ Պուտինի հետ բանակցությունների՝ փետրվարի 11-ին, մարտի 13-ին և ապրիլի 11-ին։

Թարգմանությունը՝ Էմմա Չոբանյանի