Խոշոր արտադրողները, ըստ երևույթին, լծակներ ունեն Գյուղատնտեսության նախարարության վրա․ Հրաչ Բերբերյան

Ագրարագյուղացիական միավորման նախագահ Հրաչ Բերբերյանի համոզմամբ՝ այս տարվա շոգ եղանակը դարձավ պատճառ, որպեսզի կարտոֆիլի բերքը պակաս լինի, ինչն էլ հանգեցրեց կարտոֆիլի գնի աճի։ Այս մասին այսօր հրավիրված մամուլի ասուլիսի ժամանակ ասաց Բերբերյանը՝ նշելով որ առաջիկայում կարտոֆիլի գինը կհասնի 250-ից մինչև 300 դրամի:

«Ագրարագյուղացիական միավորում» ՀԿ նախագահը նաև նշեց, որ այս տարի առհասարակ գրանցվել է ցանքատարածությունների կրճատում։ «Կրճատվել են նաև պոմիդորի ցանքատարածությունները, որի արդյունքում ստիպված էինք Աստրախանից պոմիդոր ներկրել»,- ասաց նա՝ ընդգծելով, որ ստեղծված իրավիճակը գյուղատնտեսության նախարարությունում տարվող ոչ ճիշտ քաղաքականության պատճառով է։

«Ակնհայտ է, որ վարչապետն օբյեկտիվ տեղեկատվություն չի ստանում։ Վարչապետը Գյուղատնտեսության նախարարությանը հանձնարարել է մեկ ամսվա ընթացքում վնասակար միջատների դեմ պայքարի վերաբերյալ համապատասխան ծրագիր ներկայացնել, սակայն ծրագիրը դեռևս չկա»,- ասաց Բերբերյանը՝ հիշեցնեով, որ այս խնդրով քննարկումներ են եղել Իրանի մասնագետների հետ, քանի որ նրանք գտել են արդյունավետ մեթոդներ։

«Մեր իշխանությունները հարցին առարկայական լուծում չեն տալիս, քանի որ որոշ օլիգարխները, ունենալով խոշոր ջերմոցային տնտեսություններ, արգելում են արտադրությունը՝ 250 դրամ մեծածախ գներ սահմանելով: Մինչդեռ գյուղացիները ձեռնարկություններին պոմիդորը հանձնում են 30-40 դրամով: Սա խոսում է այն մասին, որ նշված խոշոր արտադրողները, ըստ երևույթին, լծակներ ունեն Գյուղատնտեսության նախարարության վրա: Գյուղացիները, հասկանալով, որ պատշաճ արդյունք չեն ստանա, ռիսկի չեն գնում և պոմիդոր չեն աճեցնում », – ասաց Բերբերյանը:

Ագրարագյուղացիական միավորման նախագահը նշեց, որ իրենք պատրաստ են Կառավարությանը ծրագիր ներկայացնել, որի արդյունքում վնասակար միջատների հետ կապված խնդիրը կլուծվի մեկ տարվա ընթացքում, իսկ իրենց ներկայացրած ծրագիրը կարելի է կիրառել ՀՀ բոլոր մարզերում։