Բաքվում շինծու գործերով նիստում, իբր, «Քարվաճառի օկուպացիայի» հետ կապված տեսանյութեր են ցուցադրվել՝ Արշավիր Ղարամյանի մասնակցությամբ

Բաքվում երեկ տեղի է ունեցել Արցախի ղեկավարների ու պաշտոնյաների շինծու գործերով դատական հերթական նիստը դատավոր Զեյնալ Աղաևի նախագահությամբ։ Ադրբեջանական լրատվամիջոցների հաղորդմամբ՝ դատական ​​նիստին մասնակցել են հայ գերիները, նրանց պաշտպանները, «տուժողներից» մի քանիսը, նրանց իրավահաջորդներն ու ներկայացուցիչները, ինչպես նաև՝ պետական ​​մեղադրանքը պաշտպանող դատախազները։

Դատարանում հատուկ հանձնարարությունների գծով գլխավոր դատախազի օգնական Թուգայ Ռահիմլին առաջին անգամ ներկայացրել է իբր «հայերի կողմից Քարվաճառի օկուպացիայի ժամանակ նկարահանված» կադրեր։ Դատական նիստի այս հատվածին արդեն անդրադարձել ենք։

Այնուհետև «տուժողներն են » հարցաքննվել։ Առաջինը հարցերին պատասխանել է Զաբիլ Սաֆարովը, որն, իբր , պատանդ է վերցվել Քարվաճառի գործողության ժամանակ։ Նա, պատասխանելով մեղադրող Թարանա Մամեդովայի հարցին, ասել է, որ դատարանում ցուցադրված տեսագրությունը արվել է 1993 թվականի ապրիլի 12-ին։ Տեսանյութում հենց ինքն է պատկերված։ Նա ասել է, որ ինքը գերությունից ազատ է արձակվել 1995 թվականի նոյեմբերին։

Այսպես մի շարք «տուժողներ են» ցուցմուքներ տվել, որից հետո ցուցադրվել է մեկ այլ տեսանյութ։ Այդ տեսանյութում Արշավիր Ղարամյանը, որը հետագայում դարձել է Արցախի ներքին գործերի, ազգային անվտանգության նախարար, գլխավոր դատախազ, ազգային անվտանգության խորհրդի քարտուղար,  ասում է, որ զինվորականների մարտական ​​ոգին լավ է։

Ավելի ուշ ցուցադրվել է  տեսանյութ Ապահեն (Բաշլիբել) գյուղի, իբր, «հայկական բանակի կողմից օկուպացիայի մասին»։

Հաջորդ դատական նիստը նշանակվել է մայիսի 12-ին։

Թարգմանությունը՝ Էմմա Չոբանյանի