24.06.2026 | 20:10
Զինվորի տունը՝ նաև երեխաների համար․ վերականգնողական նոր բաժանմունք է բացվել. ՏԵՍԱՆՅՈՒԹ
Փաշինյանը հաստատեց. մայիսի 9-ին կմեկնի Մոսկվա
Քաղաքականություն
07.05.2025 | 16:51
Նիկոլ Փաշինյանը մայիսի 9-ին կմեկնի Մոսկվա՝ մասնակցելու Հաղթանակի օրվան նվիրված տոնակատարություններին, այս մասին ԱԺ-ում հարցուպատասխանից առաջ լրագրողների հարցին ի պատասխան հայտնեց հենց ինքը՝ վարչապետը։
«Այո՛, այո՛, գնալու եմ»,- կարճ արձագանքեց Փաշինյանը։
Հիշեցնենք, որ մինչև այս պահը վարչապետի աշխատակազմից չէին հաստատում Փաշինյանի Մոսկվա մեկնելու մասին լուրը։
Ավելի վաղ այս հարցով Factor.am-ը գրավոր հարցում էր ուղարկել վարչապետի աշխատակազմ՝ հետաքրքրվելով, թե հաշվի առնելով ԵՄ զգուշացումները՝ Նիկոլ Փաշինյանը մասնակցելո՞ւ է Մոսկվայում կայանալիք Հաղթանակի միջոցառումներին, թե՝ ոչ։ Մեր գրավոր հարցումը վարչապետի աշխատակազմի տեղեկատվության և հասարակայնության հետ կապերի վարչությունը վերահասցեագրել էր «Հանրային կապերի և տեղեկատվության կենտրոն» ՊՈԱԿ-ին։ Երբ փորձեցինք պարզել, թե ինչ փուլում է մեր հարցման պատասխանը, ՊՈԱԿ-ի տնօրեն Գոռ Ծառուկյանը նախ զարմացել էր, որ հարցումն իրենց է հասցեագրվել, հետո էլ ասփլ, թե արձակուրդում է և որևէ տեղեկություն չունի հայտնելու։
Ավելի վաղ ԵՄ արտաքին գործերի և անվտանգության քաղաքականության հարցերով բարձրաստիճան ներկայացուցիչ Կայա Կալլասը ԵՄ ԱԳ նախարարների հանդիպման ժամանակ հայտարարել էր, որ ԵՄ անդամության թեկնածու երկրները պետք է չմասնակցեն Մոսկվայում մայիսի 9-ի զորահանդեսին։ Իսկ Լատվիայի արտաքին գործերի նախարար Բաիբա Բրաժեն էլ ակնարկել էր հնարավոր պատժամիջոցների կիրառման մասին։ Նշենք, որ Հայաստանը թեև ԵՄ անդամության թեկնածու չէ, սակայն ՀՀ ԱԺ-ն ավելի վաղ ընդունել էր «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
Հիշեցնենք՝ մարտի 14-ին ՀՀ վարչապետ Նիկոլ Փաշինյանի ու ՌԴ նախագահ Վլադիմիր Պուտինի միջև կայացած հեռախոսազրույցից հետո Կրեմլի փոխանցմամբ՝ «Հայաստանի վարչապետը հաստատել է, որ ընդունում է Ռուսաստանի նախագահի հրավերն ու մասնակցելու է մայիսի 9-ին Մոսկվայում նախանշված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին»։ Մարտին էլ վարչապետի մամուլի խոսակ Նազելի Բաղդասարյանը տեղեկացրել էր, որ մայիսի 9-ին ՌԴ-ում Փաշինյան-Պուտին-Ալիև եռակողմ ձևաչափով հանդիպում նախատեսված չէ, առանց հստակեցնելու՝ արդյոք, առհասարակ, Փաշինյանի Մոսկվա այց նախատեսված է, թե՝ ոչ։ Հավելենք նաև, որ նախորդ տարի Նիկոլ Փաշինյանը չէր մեկնել Մոսկվա և չէր մասնակցել Հաղթանակի շքերթին։ Փաշինյանը Մոսկվայում Հաղթանակի տոնակատարություններին մասնակցել էր 2023 թվականի մայիսի 9-ին։
