ՔԿՀ-ում ինքնասպանության դեպքերը կապված են հոգեկան առողջական խնդիր ունեցողների հետ. նախարար․ ՏԵՍԱՆՅՈՒԹ

ՔԿՀ-ներում մահվան դեպքերը տարբեր են, դրանց մի մասը բնական մահեր են պայմանավորված անձանց որոշակի հիվանդություններով, ցավոք սրտի, մի մասն էլ ինքնասպանության դեպքեր են և դրա հետ կապված ակտիվ աշխատանքներ են հիմա կատարվում: Այս մասին այսօր՝ մայիսի 7-ին, ԱԺ-ում լրագրողների հետ զրույցում նշեց ՀՀ արդարադատության նախարար Սրբուհի Գալյանը:

Գալյանը հավաստիացրեց, որ մահվան բոլոր դեպքերն ուսումնասիրվում են. «Ես չեմ ուզի դեպքերն անհատականացնել, բայց այս պահի դրությամբ առկա տվյալներով բոլոր դեպքերը կապված են հոգեկան առողջության որոշակի խնդիրներ ունեցող անձանց հետ: Այսինքն՝ այդ անձինք, ըստ էության, հակված են եղել ժամանակին ինքնավնասման: Մենք որքան էլ փորձում ենք հետևել, որպեսզի այդ ինքնավնասումները ճակատագրական ելքի չհանգեցնեն, երբեմն չենք հաջողվում այդ աշխատանքում: Դա է պատճառը, որ հիմա ուսումնասիրում ենք միջազգային փորձը, որպեսզի նմանատիպ հակվածություն ունեցող անձանց խցերում տեղադրենք տեսախցիկներ:

Սա նորամուծություն է լինելու, բայց այլ կերպ պայքարելը այս երևույթի դեմ ուղղակի հնարավոր չէ: Այս առումով մեր միջազգային գործընկերներն էլ ասում են այլ հնարավոր տարբերակ, քան տեսախցիկներով նմանատիպ անձանց վերահսկելն է, ուղղակի գոյություն չունի: Սա քայլերից մեկն է որ նախատեսում ենք մենք անել որպեսզի նմանատիպ անձանց կյանքի իրավունքը, այսպես ասեմ, մենք կարողանանք ապահովել»,- ասաց Գալյանը:

Մանրամասները՝ տեսանյութում։