Սպառողների իրավունքների պաշտպանության օրենսդրությունը համապատասխանեցնում ենք ԵՄ-ին․ Գևորգ Պապոյան․ ՏԵՍԱՆՅՈՒԹ

ԱԺ տնտեսական հարցերի մշտական հանձնաժողովի նիստում քննարկվում է «Տնտեսական մրցակցության պաշտպանության մասին» օրենքում լրացումներ և փոփոխություններ կատարելու մասին օրենքի նախագիծը։ Հիմնական զեկուցողը Էկոնոմիկայի նախարար Գևորգ Պապոյանն է։ Նախարարը հայտարարեց, որ նպատակը սպառողների իրավունքների պաշտպանության օրենսդրության համապատասխանեցումն է ԵՄ-ի օրենսդրությանը։ Գևորգ Պապոյանը նշեց, որ գործող օրենքում բացակայում են  սպառողների իրավունքների պաշտպանության վարչաիրավական մեխանիզմների վերաբերյալ կարգավորումներ, սպառողների իրավունքների վերաբերյալ անարդար գործելակերպի դեպքում վարույթ հարուցելու և պատասխանատվության միջոց կիրառելու լիազորություններ ունեցող մարմիններ ևս չկան։  Բացի այդ, նախարարը նաև նշեց, որ օրենքում չկան սպառողների դեմ ուղղված անարդար, մոլորեցնող և ագրեսիվ առևտրային գործելակերպն արգելող կարգավորումներ, բացակայում են ապրանքի միավոր գնի ներկայացման կանոններն ու սպառողների շահերի դեմ ուղղված իրավախախտումների քննության հատուկ կարգավորումները:

«Ամրագրվել են սպառողների դեմ ուղղված իրավախախտումների վերաբերյալ հստակ կարգավորումներ՝ ներառյալ սպառողների դեմ անարդար առևտրային գործելակերպի ընդհանուր բնութագիրն ու դրա առավել կանխատեսելի դրսևորումները: Նախատեսվել են սպառողների դեմ ուղղված իրավախախտումների առնչությամբ վարույթների հարուցման առիթների քննարկման և վարույթների քննության առանձնահատկությունները: Սահմանվել է պատասխանատվություն՝ սպառողների դեմ ուղղված իրավախախտումների համար»,- ընդգծեց Պապոյանը։

Մանրամասները՝ տեսանյութում։