Թեհրանը խոստորեն դատապարտել է ԱՄՆ-ի կողմից Իրանի դեմ նոր պատժամիջոցների սահմանումը

Իրանի ԱԳՆ խոսնակ Էսմայիլ Բաղային խստորեն դատապարտել է ԱՄՆ-ի կողմից Իրանի և մի շարք այլ երկրների ֆիզիկական ու իրավաբանական անձանց նկատմամբ սահմանված նոր պատժամիջոցները՝ Իրանի հետ համագործակցության պատրվակով, փոխանցում է Mehr գործակալությունը։

Անդրադառնալով «Իրանի ժողովրդի նկատմամբ ԱՄՆ-ի թշնամական, անօրինական և անմարդկային քաղաքականության շարունակականությանը՝ նա Իրանի դեմ ԱՄՆ-ի կողմից կիրառված պատժամիջոցները համարել է միջազգային իրավունքի հիմնարար սկզբունքների և կանոնների, այդ թվում՝ մարդու իրավունքների չափանիշների խախտում»՝ ասելով, որ վերջին օրերին «տարբեր պատրվակներով իրանցի և ոչ իրանցի անհատների ու ընկերությունների դեմ հայտարարված պատժամիջոցները հստակ նշան են ԱՄՆ քաղաքականության մշակողների կողմից օրենքը խախտելու և այլ երկրների իրավունքներն ու շահերը խախտելու համառության, ինչպես նաև զարգացող երկրների միջև բարեկամական և իրավական հարաբերությունները տնտեսական ահաբեկչության միջոցով խաթարելու նրանց ջանքերի»։

«Այս պատժամիջոցները, որոնք մշակվել են Իրանի ժողովրդի վրա առավելագույն ճնշման ձախողված և հանցավոր քաղաքականությանը համապատասխան, ևս մեկ անգամ ցույց են տալիս ԱՄՆ որոշում կայացնողների հակասական մոտեցումը և դիվանագիտության ուղին ընտրելու նրանց բարի կամքի ու լրջության բացակայությունը»,- ասել է նա՝ ընդգծելով, որ Միացյալ Նահանգները պետք է պատասխանատվություն կրի Իրանի նկատմամբ ԱՄՆ պաշտոնյաների հակասական վարքագծի և սադրիչ հայտարարությունների հետևանքով առաջացած  հետևանքների համար։

Հիշեցնելով ԱՄՆ-ի երկարատև թշնամական վերաբերմունքը Իրանի ժողովրդի նկատմամբ, այդ թվում՝ տնտեսական պատժամիջոցների և Իրանի գիտական, տնտեսական և տեխնոլոգիական զարգացման ու առաջընթացի խափանման միջոցով, ինչը իրանցիների մոտ անվստահություն և խորը կասկածներ է առաջացրել Միացյալ Նահանգների նկատմամբ, Բաղային ընդգծել է Իրանի ժողովրդի վճռականությունը՝ դիմադրելու ԱՄՆ-ի սպառնալիքի և ճնշման քաղաքականությանը։

Հավելենք, որ ԱՄՆ Պետքարտուղարությունը նախօրեին հայտարարել է, որ պատժամիջոցներ է սահմանել իրանական նավթի վաճառքով զբաղվող յոթ ընկերությունների նկատմամբ։ Նոր պատժամիջոցները թիրախավորում են Արաբական Միացյալ Էմիրությունների և Թուրքիայի հինգ ընկերություններ, որոնք իրանական նավթաքիմիական արտադրանք են վաճառել երրորդ երկրներին, ինչպես նաև երկու նավագնացության ընկերություններ։ Պետքարտուղար Մարկո Ռուբիոն հայտարարել էր, որ ԱՄՆ-ը կշարունակի գործողություններ ձեռնարկել՝ «Իրանին և նրա բոլոր գործընկերներին պատասխանատվության ենթարկելու նպատակով՝ պատժամիջոցները շրջանցելու համար»։

Թրամփի վարչակազմը շարունակում է պատժամիջոցներ կիրառել Իրանի նկատմամբ՝ չնայած այն հանգամանքին, որ ապրիլի սկզբին Օմանի միջնորդությամբ անուղղակի բանակցություններ են սկսվել իրանական միջուկային ծրագրի վերաբերյալ։

Հավելենք, որ ԱՄՆ-ի և Իրանի բանակցությունների հաջորդ փուլը տեղի է ունենալու Հռոմում։

Թարգմանությունը՝ Էմմա Չոբանյանի