Բաքվում շինծու դատական նիստում Արկադի Ղուկասյանը և Դավիթ Իշխանյանն արձագանքել են Շուշիի ազատագրման հետ կապված իրենց մասնակցությամբ տեսանյութերին

Բաքվում ընթացող Արցախի ղեկավարների շինծու գործերով դատական նիստում կրկին հայկական ուժերի կողմից Շուշիի ազատագրման գործողությունն է քննարկվում։ Ադրբեջանական լրատվամիջոցների հաղորդմամբ՝ նիստում ցուցադրվել են տեսանյութեր, որոնք վկայում են Արցախի նախկին նախագահ Արկադի Ղուկասյանի՝ Շուշիում ազատագրումից անմիջապես հետո այնտեղ գտնվելու մասին։ Տեսանյութի ուսումնասիրության ժամանակ ադրբեջանական պետական ​​մեղադրանքը  պաշտպանող դատախազները հարցեր են ուղղել Ղուկասյանին։

Ի պատասխան՝ Արցախի նախկին նախագահը թվարկել է տեսագրության մեջ Շուշիում իր հետ գտնվող անձանց անունները։

Բացի այդ, ցուցադրվել է տեսանյութ, որտեղ երևում է, թե ինչպես է Արցախի ԱԺ նախագահ Դավիթ Իշխանյանը փակում Շուշիի ազատագրումը կանխել ցանկացող ադրբեջանցի զինվորների ճանապարհը։

Ասվում է, թե «հայերի կողմից պատրաստված տեսանյութում նշվում է՝ Իշխանյանը և նրա խումբը Մոնթե Մելքոնյանի հրամանով փակել են ճանապարհը՝ ադրբեջանական զինվորականների առաջխաղացումը կանգնեցնելու համար»։ Նշվել է, որ 1992 թվականի մայիսի 15-ին մարտի ժամանակ զոհվել է ջոկատի հրամանատար Արմեն Ավոկյանը, նրա փոխարեն նշանակվել է Դավիթ Իշխանյանը։

Դավիթ Իշխանյանը նշել է, որ տեսանյութում ներկայացված փաստերը սխալ են, և որ տեսանյութը նկարահանվել է քարոզչական նպատակներով։ Նա նշել է, որ այդ ֆիլմը նկարահանվել է 2020 թվականի սկզբին՝ ԼՂ-ում խորհրդարանական և նախագահական ընտրությունների նախօրեին։

«Սա քարոզչություն էր։ Ես այդ ժամանակ ձեռնափայտով էի քայլում։ Նույնիսկ եթե ուզենայի, ֆիզիկապես չէի կարող մասնակցել»,- ասել է Իշխանյանը։

Դատական նիստը շարունակվում է։

Հիշեցնենք, որ ապրիլի 28-ին տեղի ունեցած նիստում քննարկվել էր 1992 թվականի մայիսին հայկական ուժերի կողմից Շուշիի ազատագրման գործողությունը։

Թարգմանությունը՝ Էմմա Չոբանյանի