01.08.2026 | 23:46
Արման Ծառուկյանը հաղթեց երևանյան մենամարտում. ՏԵՍԱՆՅՈՒԹ
Կտրել-տարել էին նոր կառուցվող բարձրավոլտ էլեկտրացանցի հաղորդալարեր. Սիսիանի համայնքային ոստիկանների բացահայտումը
30.04.2025 | 15:28
Համայնքային ոստիկանության Սիսիանի բաժնի ծառայողները ստացել են օպերատիվ տեղեկություն, որ Գորիս համայնքի Հարթաշեն բնակավայրի երեք բնակիչ Երևան-Մեղրի ավտոճանապարհի 198-199-րդ կիլոմետրերի հատվածում կառուցվող և կարևորագույն նշանակություն ունեցող բարձրավոլտ ցանցի էլեկտրասյուներից կատարում են հաղորդալարերի գողություն․ տեղեկացնում են ՆԳՆ ոստիկանությունից։
Հետագա միջոցառումներով պարզվեց, որ նրանք կտրած-գողացված հաղորդալարերը տեղափոխելու համար բարձել են 33-ամյա հարթաշենցու վարած բեռնատարը, գողության ժամանակ օգտագործած գործիքներն էլ թաքցրել են ավտոմեքենայում:
Ապրիլի 20-ին` ժամը 17.17-ին, բեռնատարը հայտնաբերվեց նույն ավտոճանապարհին: Վարորդը, 36 և 17 տարեկան ուղևորները գողություն կատարելու կասկածանքով ձերբակալվեցին ու ներկայացվեցին Սիսիանի բաժին, իսկ մեքենան տեղափոխվեց պահպանվող հատուկ տարածք:
Սյունիքի մարզային քննչական վարչությունում նախաձեռնված քրեական վարույթի շրջանակում կատարված խուզարկությամբ մեքենայում հայտնաբերվեցին ավելի քան 1600 մետր ալյումինե հաղորդալար և ալյումինե դետալներ, նաև հանցագործության գործիքները` էլեկտրական մետաղահատիչ, շարժիչային գեներատոր, ակցան:
33-ամյա վարորդի տան և օժանդակ շինությունների խուզարկությամբ հայտնաբերվել են նույն տեղից գողացված հաղորդալարեր, հեղյուս-մանեկներով արկղեր, մետաղյա դետալներ:
Երեք անձի մեղադրանք է ներկայացվել։
Նախաքննությամբ հանգամանքները պարզվում են:
