Մարկո Ռուբիոն կրկին նախազգուշացրել է՝ ԱՄՆ-ը կարող է դուրս գալ Ուկրաինայի հարցով բանակցություներից

ԱՄՆ պետքարտուղար Մարկո Ռուբիոն զգուշացրել է, որ Վաշինգտոնը կհրաժարվի Ուկրաինայում պատերազմը կարգավորելու միջնորդական ջանքերից, եթե Մոսկվան և Կիևը չներկայացնեն «կոնկրետ առաջարկներ», փոխանցում է BBC-ի ռուսական ծառայությունը։

«Մենք հիմա գտնվում ենք մի ժամանակաշրջանում, երբ երկու կողմերն էլ պետք է այս հակամարտությանը վերջ տալու վերաբերյալ կոնկրետ առաջարկներ ներկայացնեն։ Եթե առաջընթաց չլինի, մենք կհրաժարվենք այս գործընթացում միջնորդի մեր դերից»,- ասել է Պետքարտուղարության խոսնակ Թեմի Բրյուսը՝ վկայակոչելով Ռուբիոյի խոսքերը։

Նա նշել է, որ դիվանագիտական ​​ջանքերը շարունակելու վերաբերյալ վերջնական որոշումը կայացնելու է ԱՄՆ նախագահ Դոնալդ Թրամփը։

ՌԴ նախագահ Վլադիմիր Պուտինն ավելի վաղ մայիսի 8-10-ը եռօրյա հրադադար էր առաջարկել Հաղթանակի օրվա կապակցությամբ, սակայն ռուսական կողմը մերժել էր Վաշինգտոնի և Կիևի 30-օրյա հրադադարի կոչերը։

Ըստ Պետքարտուղարության մամուլի խոսնակի՝ ԱՄՆ-ը հույսը դնում է ոչ թե եռօրյա հրադադարի, այլ «լիակատար հրադադարի և հակամարտության դադարեցման» վրա։

Նախօրեին էլ ՌԴ արտաքին գործերի նախարար Սերգեյ Լավրովը հայտարարել էր, որ Պուտինի առաջարկն «ուղիղ բանակցությունների սկիզբն է»։ Ուկրաինական կողմն առաջարկել է չսպասել մինչև մայիսի 8-ը, այլ անմիջապես հայտարարել հրադադարի մասին։ Ուկրաինայի նախագահ Վլադիմիր Զելենսկին Պուտինի խոսքերը որակել էր «մանիպուլյացիայի փորձ»։

Ե՛վ Դոնալդ Թրամփը, և՛ պետքարտուղար Ռուբիոն արդեն իսկ ասել են, որ Վաշինգտոնը կդուրս գա բանակցային գործընթացից, եթե կողմերն առաջիկայում առաջընթաց չգրանցեն։ Մասնավորապես, The Atlantic-ի գլխավոր խմբագիր Ջեֆրի Գոլդբերգի հետ զրույցում Թրամփը բանակցությունների մասին ասել է. «Կտեսնենք, թե ինչ կլինի հաջորդ շաբաթվա ընթացքում։ Մնացել են վերջին շտրիխները»։

Թարգմանությունը՝ Էմմա Չոբանյանի