25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
ԱՄՆ-ը փակում է Սիրիայում 8 բազաներից 3-ն ու կրճատում զորքերի թիվը
Քաղաքականություն
18.04.2025 | 13:19
ԱՄՆ-ը փակում է Սիրիայի հյուսիս-արևելքում գտնվող իր ութ օպերատիվ բազաներից երեքը, իսկ երկրում տեղակայված ամերիկացի զինվորների թիվը 2000-ից կրճատում է մինչև 1400-ի։ Այս մասին գրում է The New York Times-ը՝ վկայակոչելով երկու ամերիկացի բարձրաստիճան պաշտոնյաների, փոխանցում է DW-ի ռուսական ծառայությունը։
Լրատվամիջոցը նշում է, որ փակվում են Mission Support Site Green Village, MSS Euphrates բազաներն ու ևս մեկ շատ ավելի փոքր օբյեկտ։ Ըստ NYT-ի՝ 60 օրից ամերիկացի հրամանատարները պետք է որոշեն՝ արդյո՞ք արժե ավելի շատ կրճատել զորակազմը։
Մասնագետները խորհուրդ են տվել Սիրիայում թողնել առնվազն 500 ամերիկացի զինծառայողների, սակայն ԱՄՆ նախագահ Դոնալդ Թրամփը «խորը կասկած է հայտնել» երկրում ընդհանրապես ամերիկյան զորք պահելու վերաբերյալ։ Ըստ լրատվամիջոցի՝ Բաշար Ասադի ռեժիմի տապալումը նվազեցրել է Սիրիայում սպառնալիքների թիվը՝ «գոնե առայժմ»։
NYT-ի զրուցակիցներն ասել են, որ Սիրիայում ամերիկացի զինվորականները, չնայած քիչ են, սակայն մտադիր են շարունակել աջակցել քրդերի ղեկավարած «Սիրիական դեմոկրատական ուժերին» (SDF)։ Մարտի 10-ին հայտնի էր դարձել, որ SDF-ը Սիրիայի նոր իշխանությունների հետ համաձայնության է հասել քաղաքացիական ու ռազմական կառույցները նոր քաղաքական համակարգում ներգրավելու հարցով։
Ավելի վաղ էլ իսրայելական Ynet-ը հայտնել էր, որ ԱՄՆ-ն Իսրայելին տեղեկացրել է երկու ամսվա ընթացում զորքերի դուրսբերումը սկսելու մտադրության մասին։ Ըստ լրատվամիջոցի՝ իսրայելական ղեկավարությունը փորձում է համոզել ԱՄՆ-ին վերանայել որոշումը՝ մտավախություն ունենալով, որ ամերիկացիների հեռացումը կբերի տարածաշրջանում Թուրքիայի դիրքերի ուժեղացման։ Ապրիլի 16-ին էլ Իսրայելի ԱԳ նախարար Իսրայել Կացը հայտարարել էր, որ իր երկիրը մտադիր է պահպանել ռազմական վերահսկողությունը Գազայում, Լիբանանում և Սիրիայում իր կողմից զբաղեցրած տարածքների նկատմամբ։ Նա նշել էր, որ բանակը կմնա «անվտանգության այդ գոտիներում»՝ վպաշտպանելու երկիրը թշնամական ուժերից»։
Թարգմանությունը՝ Էմմա Չոբանյանի
