25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
Այսօր ղրղզներն են, վաղը կարող են լինել հայերը․ ՌԴ-ից ապօրինի միգրանտներին արտաքսում է սպառնում. ՏԵՍԱՆՅՈՒԹ
Քաղաքականություն
17.04.2025 | 20:15
Սոցցանցերում տարածվել են կադրեր, որտեղ երևում է, թե ինչպես են ռուս իրավապահները Ղրղզստանի քաղաքացիներին ստիպում սողալ և պառկել հատակին, իսկ դիմակավորված ուժայինները քայլում են ղրղզ միգրանտների վրայով։ Միգրանտների աղմկահարույց ձերբակալությունը տեղի է ունեցել Մոսկվայի «Բոդրոստ» բաղնիքում անցած շաբաթ։
Ոստիկանները որևէ ապօրինի գործողություն դեպքի մասնակիցների նկատմամբ չեն իրականացրել՝ կատարվածն այսպես է մեկնաբանել Ռուսաստանի ներքին գործերի նախարարությունը։ Մոսկվան պնդում է՝ իրավապահներն անցկացրել են ռեյդեր և հայտնաբերել 25 ներգաղթյալի, որոնք խախտել են ՌԴ-ում գտնվելու կարգը։
Ղրղզստանի քաղաքացիների հետ տեղի ունեցածը սպառնում է բոլոր ապօրինի միգրանտներին՝ ասում է «Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանը։ Նրա խոսքով՝ փետրվարի 5-ից հետո ուժի մեջ մտած արտաքսման ռեժիմի պայմաններում ՌԴ-ն գրեթե ամեն օր իրականացնում է «Անլեգալ միգրանտ» ծրագիրը։
Արդեն երկու ամիս է՝ Ռուսաստանում գործում է միգրացիոն արտաքսման ռեժիմը։ Փորձագետի խոսքով՝ արտաքսման ռեժիմի օրենքի փոփոխության մեջ հստակ ամրագրված է, որ ՌԴ իրավապահ մարմիններն իրավունք ունեն մուտք գործել միգրանտի բնակարան, այդ թվում, այսպես ասած, հաղթահարել միգրանտների դիմադրությունը, եթե դրա անհրաժեշտությունը լինի։
Քաղաքագետ Հարություն Մկրտչյանը, որը մի քանի տարի բնակվել է ՌԴ-ում, ասում է՝ միգրացիոն քաղաքականության կոշտացումը կարող է նպաստել ռուսաստանաբնակ հայերի՝ Հայաստան վերադարձի գործընթացին։
Բեժանյանը ՌԴ-ում գտնվող ՀՀ քաղաքացիներին հորդորում է՝ որևէ պարագայում կեղծ փաստաթղթեր չգնել, մասնավորապես, երեխաների համար։ ՌԴ-ում գտնվելու կարգը խախտելու հիմքով ՀՀ քաղաքացիների արտաքսման դեպքեր վերջին շրջանում գրանցվել են։ Փորձագետ Տաթևիկ Բեժանյանը նշում է երկու դեպք, երբ երեխան օրինական փաստաթղթեր չի ունեցել։ Արդյունքում երեխաներին տարել են միգրացիոն բանտ և ծնողների հետ միասին արտաքսել։
Մանրամասները` տեսանյութում։
Անի Թամրազյան
