08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
ԱՊՀ բոլոր երկրների ղեկավարները մայիսի 9-ին կմասնակցեն Մոսկվայում կայանալիք տոնակատարություններին․ Լեբեդև
Քաղաքականություն
17.04.2025 | 20:15
Մայիսի 9-ին ԱՊՀ անդամ պետությունների ղեկավարները Մոսկվայում կմասնակցեն Երկրորդ համաշխարհային պատերազմում տարած հաղթանակի 80-ամյակին նվիրված տոնակատարություններին։ Այս մասին հայտարարել է կազմակերպության գլխավոր քարտուղար Սերգեյ Լեբեդևը ԱՊՀ միջխորհրդարանական վեհաժողովի խորհրդի նիստում, փոխանցում Է ՏԱՍՍ-ը։
«Ես ուրախությամբ և գոհունակությամբ ցանկանում եմ հայտնել, որ ԱՊՀ բոլոր պետությունների ղեկավարները ներկա կլինեն մայիսի 9-ին Մոսկվայում կայանալիք տոնակատարություններին»,- ասել է նա։
Հիշեցնենք, որ դեռևս մարտի 14-ին ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև կայացած հեռախոսազրույցից հետո Կրեմլը հայտնել էր, որ Հայաստանի վարչապետը հաստատել է, որ ընդունում է Ռուսաստանի նախագահի հրավերն ու մասնակցելու է մայիսի 9-ին Մոսկվայում նախանշված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին։
Սակայն հայկական կողմը մինչ օր պաշտոնապես չի հաստատել Փաշինյանի մասնակցությունը Մոսկվայում կայանալիք միջոցառումներին։ Օրերս ՀՀ վարչապետի մամուլի խոսակ Նազելի Բաղդասարյանը հայտարարել էր, որ մայիսի 9-ին ՌԴ-ում Փաշինյան-Պուտին-Ալիև եռակողմ ձևաչափով հանդիպում նախատեսված չէ, առանց հստակեցնելու՝ արդյո՞ք Փաշինյանի այց Մոսկվա նախատեսված է։
Factor TV-ն բազմիցս փորձել է պարզել՝ արդյո՞ք ՀՀ վարչապետն այցելելու է Մոսկվա՝ մայիսի 9-ի տոնակատարություններին մասնակցելու, սակայն գրավոր ու բանավոր հարցումներն այդպես էլ մնացել են անպատասխան։
Թարգմանությունը՝ Էմմա Չոբանյանի
