Քաղաքականություն
17.04.2025 | 16:41
ԵՏՄ անդամ պետությունների քաղաքացիների համար ռուս-բելառուսական սահմանով տեղաշարժի սահմանափակման հետ կապված խոչընդոտը վերացվել է։ Այս մասին հայտնում է Եվրասիական տնտեսական հանձնաժողովը։
Նշվում է, որ 2025 թվականի հունվարի 11-ին ուժի մեջ է մտել Ռուսաստանի և Բելառուսի կառավարությունների միջև վիզաների փոխադարձ ճանաչման և օտարերկրյա քաղաքացիների ու քաղաքացիություն չունեցող անձանց 2020 թվականի հունիսի 19-ի Միութենական պետության ստեղծման մասին պայմանագրի մասնակից պետությունների տարածքներ մուտք գործելու հետ կապված այլ հարցերի վերաբերյալ համաձայնագիրը։
«Ռուսաստանի Դաշնությունը և Բելառուսի Հանրապետությունը Եվրասիական տնտեսական հանձնաժողովին տեղեկացրել են, որ Հայաստանի Հանրապետության, Ղազախստանի Հանրապետության և Ղրղզստանի Հանրապետության քաղաքացիները ներկայում գործնական հնարավորություն ունեն Բելառուսի Հանրապետությունից Ռուսաստանի Դաշնություն մուտք գործել և Ռուսաստանի Դաշնությունից Բելառուսի Հանրապետություն դուրս գալու համար օգտագործվող միջազգային երկաթուղային և օդային երթուղիներով, ինչպես նաև Համաձայնագրի հավելվածում թվարկված ավտոմոբիլային երթուղիներով»,-ասվում է հայտարարության մեջ։
Նշվում է, որ նախկինում վերոնշյալ երկրների քաղաքացիները կարող էին մուտք գործել Ռուսաստան Բելառուսի Հանրապետությունից և մեկնել Ռուսաստանի Դաշնությունից Բելառուսի Հանրապետություն միայն օդային ճանապարհով։
Համաձայնագրի ուժի մեջ մտնելու պահից Հայաստանի, Ղազախստանի և Ղրղզստանի քաղաքացիները կարող են հատել բելառուս-ռուսական սահմանը ինչպես ավտոմոբիլային, այնպես էլ երկաթուղային տրանսպորտով։
«ԵՏՄ անդամ պետությունների և Հանձնաժողովի համատեղ աշխատանքի շնորհիվ Հայաստանի Հանրապետության, Ղազախստանի Հանրապետության և Ղրղզստանի Հանրապետության քաղաքացիները հնարավորություն են ստացել ազատորեն տեղաշարժվել ռուս-բելառուսական սահմանով։ ԵՏՄ ներքին շուկայում խոչընդոտների վերացման համակարգված աշխատանքը շարունակվում է և կշարունակվի։ Այս հանգամանքը, անկասկած, դրական ազդեցություն կունենա մեր երկրների միջև անձանց և աշխատանքային ռեսուրսների ազատ տեղաշարժի գործնական իրականացման վրա, ինչպես նաև կնպաստի Միությունում ներքին զբոսաշրջության զարգացմանը»,- նշել է ԵՏՀ ներքին շուկաների, տեղեկատվական տեխնոլոգիաների և տեղեկատվական ու հաղորդակցական տեխնոլոգիաների նախարար Վարոս Սիմոնյանը։
2025 թվականի ապրիլի 15-ին Հանձնաժողովի խորհուրդը քննարկել է այս խոչընդոտը վերացնելու հարցը։
Թարգմանությունը՝ Էմմա Չոբանյանի
