20.03.2026 | 19:43
Ազդում է Մոսկվայի շահերի վրա. ՌԴ ԱԳՆ-ն մեկնաբանել է Կասպից ծովում Իրանի նավահանգստին Իսրայելի հարվածների մասին
Ռուբեն Վարդազարյանի գործով նիստը․ ՈՒՂԻՂ
Հասարակություն
17.04.2025 | 15:04
Հակակոռուպցիոն դատարանում՝ նախագահությամբ դատավոր Վահե Դոլմազյանի, այսօր շարունակվում է ԲԴԽ նախկին նախագահ Ռուբեն Վարդազարյանի գործի քննությունը: Այսօր որպես վկա ցուցմունք տալու համար պետք է դատարան ներկայանա ԱԱԾ փոխտնօրեն Անդրանիկ Սիմոնյանը, որը նախկինում եղել է դատավոր:
Հիշեցնենք, որ Վարդազարյանը մեղադրվում է արդարադատության իրականացմանը միջամտելու մեջ: Ըստ քրեական գործի` նա, ԲԴԽ նախագահը լինելով, Լոռու մարզի ընդհանուր իրավասության դատարանի դատավոր Անդրանիկ Սիմոնյանին հորդորել, խնդրել է կալանքի տակ գտնվող քրեական հեղինակություն «Ալավերդցի Վահագնի»` Վահագն Աբգարյանի խափանման միջոցը փոխել ազատազրկման հետ չկապված խափանման միջոցով։ Վարդազարյանի դեմ հաղորդումը ներկայացրել է Սիմոնյանը՝ իրավապահներին ներկայացնելով մի ձայնագրություն, որում, նրա պնդմամբ, խոսում են ինքն ու Վարդազարյանը: Սիմոնյանի հաղորդումից հետո նա նշանակվել է ԱԱԾ պետի տեղակալ: Վարդազարյանի նկատմամբ քրեական հետապնդում հարուցվելուց հետո ԲԴԽ նախագահի պարտականությունները կատարել է ԲԴԽ անդամ Գագիկ Ջհանգիրյանը: Քրեական գործի քննության ընթացքում հրապարակվել է մի ձայնագրություն, որում Գագիկ Ջհանգիրյանը Վարդազարյանին հորդորում է հրաժարական տալ ԲԴԽ նախագահի պաշտոնից` փոխարենը խոստանալով այնպես անել, որ Վարդազարյանի վերաբերյալ գործը կարճվի: Այս գործը դատարան է ուղարկել 2021 թվականի սեպտեմբերին և մակագրվել Երևանի քրեական դատարանի դատավոր Գնել Գասպարյանին, սակայն մինչև 2022-ի հուլիս Գասպարյանը գործով դեռևս նախապատրաստական փուլում էր։ 2022 թվականի հուլիսին ստեղծվեց Հակակոռուպցիոն դատարանը։ Հուլիսի 1-ից ուժի մեջ մտած Քրեական դատավարության օրենսգրքով էլ սահմանվում էր, որ ընդհանուր իրավասության քրեական դատարաններում քննվող կոռուպցիոն բնույթի այն գործերը, որոնք հուլիսի 1-ի դրությամբ չէին մտել դատաքննության փուլ, ուղարկվում են Հակակոռուպցիոն դատարան։ Այսպիսով՝ Վարդազարյանի գործը ևս ուղարկվել է Հակակոռուպցիոն դատարան և մակագրվել դատավոր Վահե Դոլմազյանին։ Վարդազարյանն իրեն առաջադրված մեղադրանքը չի ընդունել։
Դատավոր Վահե Դոլմազյանը մեկ անգամ այս գործով հեռացել է խորհրդակցական սենյակ՝ դատական ակտ կայացնելու, սակայն որոշել է վերսկսել գործի քննությունը՝ հաշվի առնելով, որ Անդրանիկ Սիմոնյանին հարցաքննելու անհրաժեշտություն է եղել:
Արաքս Մամուլյան
