ԱՄՆ-ում անօրինական ներգաղթյալներին գումար և ինքնաթիռի տոմս կտան «ինքնաարտաքսվելու» համար

ԱՄՆ նախագահ Դոնալդ Թրամփը հայտարարել է, որ նախատեսում է մեկնարկել նոր ծրագիր, որը թույլ կտա անօրինական ներգաղթյալներին «ինքնաարտաքսվել»։ Ըստ Current Time-ի՝ ԱՄՆ իշխանությունները պատրաստվում են նրանց ֆինանսական աջակցություն տրամադրել՝ կամավոր կերպով երկիրը լքելու համար։

Fox Noticias-ին տված հարցազրույցում Սպիտակ տան ղեկավարը նշել է, որ «ինքնաարտաքսման» ծրագիրը նախատեսում է նաև ապագայում ԱՄՆ մուտքի օրինական հնարավորություն։

«Մենք նրանց կտրամադրենք կրթաթոշակ, որոշակի գումար և ինքնաթիռի տոմս։ Ապա կաշխատենք նրանց հետ։ Եթե նրանք պատշաճ պահեն իրենց, և եթե ցանկանանք նրանց վերադարձը, ապա հնարավորինս շուտ  կարող է տեղի ունենալ այդ գործընթացը»,-ասել է Թրամփը Fox News-ի իսպանալեզու Fox Noticias հաղորդաշարի եթերում։

Թրամփը չի ներկայացրել մանրամասներ այն մասին, թե ինչպես է ծրագիրը գործելու։

2024 թ․ մարտին Թրամփի վարչակազմը գործարկել է CBP Home անվանումով նոր հավելված, որը նախատեսված է անօրինական ներգաղթյալների «ինքնաարտաքսման» գործընթացը հեշտացնելու համար։ Ըստ հաղորդագրությունների՝ այս հավելվածի միջոցով ներգաղթյալները կկարողանան երկիրը լքել՝ առանց ձերբակալման կամ արտաքսման ընթացակարգերի ենթարկվելու, իսկ առավել կարևորն այն է, որ կպահպանեն ապագայում ԱՄՆ վերադառնալու օրինական հնարավորությունը։

«CBP Home հավելվածը օտարերկրացիներին հնարավորություն է տալիս անմիջապես հեռանալ ու ինքնաարտաքսվել՝ ապագայում պահպանելով ԱՄՆ վերադառնալու և ամերիկյան երազանքն իրականացնելու շանսը։ Եթե նրանք չօգտվեն այդ հնարավորությունից, մենք նրանց կգտնենք, կարտաքսենք, և նրանք այլևս երբեք չեն վերադառնա»,-  հայտարարել է ներքին անվտանգության նախարար Քրիստի Նոեմը։

CBP Home-ը փոխարինում է նախկինում գործած CBP One հավելվածին, որը գործարկվել էր Ջո Բայդենի օրոք։ Այդ հավելվածը հնարավորություն էր տալիս գրեթե մեկ միլիոն մեքսիկացի ներգաղթյալների նշանակել հանդիպում՝ ԱՄՆ օրինական մուտքի համար դիմելու նպատակով։ Թրամփն այդ հավելվածը փակել է ԱՄՆ նախագահի պաշտոնը ստանձնելուց ընդամենը մեկ ժամ անց։

Թարգմանությունը՝ Էմմա Չոբանյանի