29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Մեկնարկել է Ստամբուլի ընդդիմադիր քաղաքապետ Իմամօղլուի դատավարությունը
Քաղաքականություն
11.04.2025 | 20:22
Ստամբուլի կալանավորված ընդդիմադիր քաղաքապետ Էքրեմ Իմամօղլուի դեմ հարուցված քրեական գործերով առաջին լսումն է այսօր տեղի ունեցել Սիլիվրի բանտում, որտեղ պահվում է ընդդիմադիր գործիչը։ Այս գործը կենտրոնանում է Իմամօղլուի՝ Ստամբուլի գլխավոր դատախազ Աքին Գյուրլեքի վերաբերյալ արված արտահայտությունների վրա։
Թուրքական լրատվամիջոցների հաղորդմամբ՝ նիստին մասնակցել են նաև Էքրեմ Իմամօղլուի կինը՝ Դիլեք Իմամօղլուն, որդին՝ Սելիմ Իմամօղլուն, պատգամավորներ, կողմերի փաստաբանները։ Ոստիկանությունը Սիլիվրիում ձեռնարկել է անվտանգության խիստ միջոցառումներ, ուր վաղ առավոտյան ժամանել են Ժողովրդահանրապետական կուսակցության (CHP) պատգամավորներն ու քաղաքապետները, որից հետո Իմամօղլուին բերել են դատարանի դահլիճ։
Էքրեմ Իմամօղլուն իր պաշտպանությունը սկսել է հետևյալ խոսքերով. «Հարգանքով ողջունում եմ բոլորիդ։ Հուսով եմ, որ մեր երկրի անունից կկայացվեն առողջ որոշումներ։ Ես ինքս ինձ հարցնում եմ, թե ինչու եմ այստեղ, և դժվարանում եմ պատասխան գտնել։ Ես այստեղ եմ, որովհետև երեք անգամ հաղթել եմ Ստամբուլի ընտրություններում, որը ոմանք անվանում են «Իմ սեր Ստամբուլ», իսկ ոմանք ասում են՝ «Ով հաղթի Ստամբուլում, հաղթում է Թուրքիայում», և կարծում են, որ այն իրենցն է։ Այսօր ես ձերբակալված եմ, որովհետև հաղթել եմ՝ իրենց կամքին հակառակ»։
Նա նաև անդրադարձել է լսումների ուղիղ հեռարձակման պահանջին, որը CHP-ն բազմիցս բարձրաձայնել է վերջին մի քանի օրերի ընթացքում։
«TRT-ն, որը գործում է քաղաքացիների հարկերով, պետք է հեռարձակի այս լսումները և չհաղորդի դրանք ստերով ու զրպարտություններով՝ ինձ վարկաբեկելու համար»,- ընդգծել է նա։
Հաղորդվում է, որ Ստամբուլի դատարանը մինչև հունիսի 16-ը հետաձգել է գործի քննությունը։
Հավելենք, որ ավելի վաղ Իմամօղլուին պաշտոնապես մեղադրանք էր առաջադրվել նահանգի գլխավոր դատախազի հասցեին հնչեցրած արտահայտությունների համար։
Թարգմանությունը՝ Էմմա Չոբանյանի
