20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Երևանի կենդանաբանական այգում զեբրի ձագ է անկել․ ո՞րն է պատճառը
09.04.2025 | 17:18
Երևանի կենդանաբանական այգում 21 օր առաջ զեբրի ձագի անկման դեպք է գրանցվել: Այս մասին Factor.am-ի գրավոր հարցմանն ի պատասխան հայտնել են Երևանի կենդանաբանական այգուց։
«Ըստ մասնագիտական եզրակացության՝ պատճառը եղել է սթրեսի հետևանքով առաջացած սրտամկանի խանգարումը (կարդիոմիոպատիա)»,- ասված է պատասխան նամակում։
Երևանի ավագանու «Մայր Հայաստան» խմբակցության անդամ Արմեն Քոչարյանի պնդմամբ՝ զեբրի ձագի անկումը ոչ մասնագիտական մոտեցման հետևանքով է եղել։ «Զեբրերին ուզեցել են քնեցնել և մի ազատավանդակից տեղափոխել ուրիշ ազատավանդակ, բայց զեբրի ձագի ներարկման դոզան եղել է նախատեսվածից բարձր, և նա չի զարթնել»,- ասել էր նա։ Երևանի կենդանաբանական այգուց անդրադարձել են նաև այս պնդմանը։
«Նախ և առաջ, կարևոր է ընդգծել, որ զեբրի ձագը ներարկումից հետո արթնացել է, և անկումը գրանցվել է ավելի քան վեց ժամ անց։ Այդ ամբողջ ընթացքում կենդանին եղել է գիտակից վիճակում։ Տեղափոխման բոլոր չափորոշիչները պահպանվել են։ Դեղամիջոցների ընտրությունը, չափաբաժինների հաշվարկումը և տեղափոխման այլ գործողություները կատարվել են վայրի կենդանիների թմրեցման և տեղափոխման կանոնակարգերի համաձայն։ Կենդանաբանական այգու անասնաբույժների և սպասարկող անձնակազմի գործողություններն իրականացվել են մասնագիտական բարձր պատասխանատվությամբ»,- հայտնել են այգուց։
Նշենք, որ այգում զեբրի անկման դեպք գրանցվել էր նաև 2018 թվականին։ Լաբորատոր հետազոտության տվյալներով՝ կենդանու արյան և մեզի մեջ հայտնաբերվել էր մեծ քանակությամբ մկնդեղի (արսեն) պարունակություն։
Արփի Հակոբյան
