17.07.2026 | 14:53
Պետական միջոցներով վերակառուցված պոմպակայանը դարձել է մասնավոր սեփականություն․ Նոյեմբերյանի համայնքապետի գործը դատարանում է
Ադրբեջանի բանակում մարտավարական զորավարժություններ են անցկացվել
Քաղաքականություն
08.04.2025 | 21:38
Ադրբեջանի բանակում, 2025 թվականի պատրաստության պլանի համաձայն, մարտավարական զորավարժություններ են անցկացվել նոր օպերատիվ հայեցակարգի կիրառմամբ՝ հաշվի առնելով ժամանակակից մարտական մեթոդները և հարմարեցված մարտական իրական պայմաններին։ Ադրբեջանի ՊՆ-ի հաղորդմամբ՝ զորավարժությունների ընթացքին հետևել են պաշտպանության նախարար Զաքիր Հասանովը և բարձրաստիճան այլ պաշտոնյաներ։
Հասանովին զեկուցվել է, որ զորավարժություններին ներգրավված տարբեր նշանակության անօդաչու թռչող սարքերն իրականացնում են տարածքի հետախուզում և օպերատիվ կերպով մարտական կառավարման կենտրոն փոխանցում պայմանական հակառակորդի թիրախների տեղակայման և զրահատեխնիկայի տեղաշարժի մասին տվյալները։
Զորավարժությունների սցենարի համաձայն՝ նախքան հարձակումը հրետանային ստորաբաժանումներով և ավիացիոն միջոցներով հարվածներ են հասցվել հակառակորդի ռեզերվներին և կենդանի ուժին, ապահովել ականապատ դաշտերով անցումների բացումը։
Զորավարժությունների ընթացքում ձեռնարկվել են գործողություններ ուղղաթիռով անձնակազմի տարհանման, հակառակորդի շարասյունը դարանակալելու և վնասազերծելու, հենակետեր գրավելու ուղղությամբ։
Նշվում է, որ մարտավարական զորավարժությունների նպատակն է կատարելագործել հրամանատարների հմտությունները օպերատիվ որոշումներ կայացնելու գործում՝ համաձայն նոր օպերատիվ հայեցակարգի, որը մշակվել է՝ հաշվի առնելով պատերազմի ժամանակակից մեթոդները, ինչպես նաև փոխգործակցության մեջ ստորաբաժանումների կառավարման հմտությունները, բարելավել նրանց տեսական և գործնական հմտությունները։
Թարգմանությունը՝ Էմմա Չոբանյանի
