08.09.2026 | 18:24
Մալաթիայի բաժնի համայնքային ոստիկանները դրամանենգության դեպք են բացահայտել․ 68-ամյա տղամարդը ձերբակալվել է
Թրամփը հայտարարել է, որ իր վարչակազմը ռեկորդային՝ 1 տրիլիոն դոլար կհատկացնի ռազմական կարիքների համար
Քաղաքականություն
08.04.2025 | 19:48
ԱՄՆ նախագահ Դոնալդ Թրամփը հայտարարել է, որ իր վարչակազմը կհաստատի պաշտպանության ռեկորդային բյուջե՝ մոտ 1 տրիլիոն դոլարի չափով, գրում է DW-ի ռուսական ծառայությունը։
«Մենք, ըստ էության, ընդունել ենք մոտ մեկ տրիլիոն դոլարի բյուջե», – ասել է Թրամփը երկուշաբթի՝ ապրիլի 7-ի երեկոյան Իսրայելի վարչապետ Բենիամին Նեթանյահուի հետ հանդիպումից հետո:
Նա նշել է, որ այս բյուջեն կլինի «ամենամեծը, որը երբևէ հատկացվել է բանակին»:
«Ոչ ոք նման բան չի տեսել։ Մենք պետք է կառուցենք մեր բանակը։ Մենք շատ տնտեսող ենք, բայց բանակն այն է, ինչ մենք պետք է կառուցենք։ Մենք պետք է ուժեղ լինենք, քանի որ հիմա շուրջը շատ վատ ուժեր կան»,- նշել է ԱՄՆ նախագահը։
ԱՄՆ պաշտպանության նախարար Փիթ Հեգսեթն իր հերթին X-ում գրել է․ «Շնորհակալություն, պարո՛ն նախագահ, շուտով առաջին տրիլիոն դոլարի պաշտպանական բյուջեն: Նախագահ Թրամփը վերականգնում է մեր բանակը և արագ»:
Թրամփը չի հստակեցրել, թե տրիլիոն դոլարը կհատկացվի բացառապես Պենտագոնի՞ն, թե ընդհանուր ազգային պաշտպանության բյուջեին, որը ներառում է այլ գերատեսչություններ։ Բայց այդ թիվը, ըստ Politico-ի, շատ ավելին է, քան 892 միլիարդ դոլարի ֆինանսավորումը, որը Կոնգրեսն այս տարի հատկացրել է ազգային պաշտպանության ծրագրերին, ներառյալ՝ Պենտագոնը:
Մարտի վերջին WP-ն գրել էր, որ Հեգսեթը Պենտագոնում տարածել է փաստաթուղթ, որը սահմանում է բանակի առաջնահերթությունները՝ Ազգային պաշտպանության միջանկյալ ռազմավարական ուղեցույցը: Դրանից հետևում էր, որ Չինաստանն է համարվում ԱՄՆ-ի գլխավոր սպառնալիքը, իսկ Ռուսաստանին առաջարկվում է թողնել հիմնականում եվրոպացի դաշնակիցներին։
Թարգմանությունը՝ Էմմա Չոբանյանի
