Հասարակություն
08.04.2025 | 20:30Freedom House միջազգային իրավապաշտան կազմակերպությունն ավարտում է աշխատանքը Հայաստանում։ Մինչ այդ կազմակերպությունը հրապարակել է տարեկան զեկույց՝ անդրադառնալով նաև Հայաստանում մարդու իրավունքների հետ կապված խնդիրներին։ Ինչ է արձանագրվել զեկույցում և ինչ ազդեցություն կունենա իրավապաշտպան կառույցի բացակայությունը Հայաստանում։ Թեմայի վերաբերյալ Factor TV-ն զրուցել է «Իրավունքների պաշտպանություն առանց սահմանների» ՀԿ փորձագետ Հասմիկ Հարությունյանի հետ։
«Այս կազմակերպությունն աջակցում էր պետական ինստիտուտներին և տեղական կառույցներին ավելի գրագետ իրականացնել փոփոխություններ և տեսնել, թե որտեղ կան բացեր»,- ասաց Հարությունյանը՝ համոզմունք հայտնելով, որ հեղինակավոր իրավապաշտպան կազմակերպության բացակայությունը չի կարող բացասական ազդեցություն չունենալ։ Կազմակերպության վերջին տարիների զեկույցներն, ըստ Հարությունյանի, ցույց են տալիս, որ Հայաստանում բարեփոխումներն առաջ չեն գնում։
«Մենք ունենք հիբրիդային ժողովրդավարություն, որտեղից հետ քայլ անելն ավելի հավանական և ռիսկային է, քան առաջ գնալն ավելի ազատ վիճակի»,- կարծում է Հարությունյանը։
Իրավապաշտպան կազմակերպությունը, անդրադառնալով Հայաստանում ընտրական գործընթացներին, արձանագրել է, որ թեև ընտրությունները մրցակցային են, հետընտրական շրջանում ընդդիմադիրները հանդիպում են հետապնդումների։ Հարությունյանը նշում է, որ կարևոր է ոչ միայն մրցակցային ու թափանցիկ ընտրություն կազմակերպվելն, այլև հետընտրական գործընթացը։
«Ժողովրդավարությունը չի ավարտվում ընտրություններով, այլ սկսվում է ընտրություններով, և հետագա գործընթացները պետք է ամրապնդեն այն, ինչ թափանցիկ, մրցակցային ընտրությունների արդյուքում հնարավոր է եղել ձեռք բերել։ Այսինքն՝ մարտահրավեր է ոչ թե թափանցիկ ընտրություն կազմակերպելը, այլ դրանից հետո նորմալ քաղաքական պրոցեսներ ապահովելը»,- ասաց Հարությունյանը։
Մանրամասները՝ տեսանյութում
Արաքս Մամուլյան
