09.10.2026 | 11:22
Կլիչկոն Կիևի բնակիչներին խորհուրդ է տվել ժամանակավորապես հեռանալ քաղաքից
ԵՄ-ն նախատեսում է 25% մաքսատուրք սահմանել ԱՄՆ-ից ապրանքների համար․ Bloomberg
Քաղաքականություն
08.04.2025 | 15:50
Եվրամիությունը չեղարկել է ամերիկյան վիսկիի համար նախատեսված 50% պատասխան մաքսատուրքը՝ միաժամանակ առաջարկելով 25% մաքսատուրք սահմանել ամերիկյան մի շարք ապրանքների համար՝ ի պատասխան նախագահ Դոնալդ Թրամփի՝ ալյումինի և պողպատի ներմուծման մաքսատուրքեր սահմանելու անցած ամիս որոշման, գրում է Bloomberg-ը։
Մի քանի անդամ երկրներ պահանջել էին մաքսատուրքերի ցանկից բացառել վիսկին՝ փորձելով խնայել եվրոպական գինի և շամպայն արտադրողներին 200% մաքսատուրքերից, որոնք սպառնում էր սահմանել Թրամփը՝ որպես վրեժխնդրություն:
Եվրահանձնաժողովի պատրաստած փաստաթղթերում, որոնց ծանոթացել է լրատվամիջոցը, թվարկված են մի քանի տասնյակ ապրանքներ, որոնց մաքսատուրքերն առաջարկվում է բարձրացնել։
Թիրախային ապրանքների ցանկը բազմազան է և ներառում է ադամանդներ, մոտոցիկլետներ, զբոսանավեր, կենցաղային տեխնիկա, ապակիներ, խաղաքարտեր, ծխախոտ, թռչնամիս և գյուղատնտեսական այլ ապրանքներ։ Շատ ապրանքների սպառնում է 25% սակագին, բայց մի քանիսին կհարվածեն 10% դրույքաչափով:
ԱՄՆ-ի մսի, հացահատիկի, գինու, փայտանյութի, հագուստի, մաստակի, զուգարանի թղթի և որոշ այլ ապրանքների համար ավելի բարձր մաքսատուրքեր սահմանելու՝ ԵՄ-ի ծրագրերի մասին ավելի վաղ հայտնել էր Reuters-ը:
Սպասվում է, որ առաջիկա մի քանի օրվա ընթացքում ԵՄ անդամ երկրները կհաստատեն մաքսատուրքերի բարձրացման ծրագիրը։ ԵՄ երկրները նպատակ ունեն պլանը հաստատել այս շաբաթվա վերջին, այն ուժի մեջ կմտնի ապրիլի 15-ին, թեև տուրքերի մեծ մասը չի գանձվի մինչև մայիսի կեսերը: Դեկտեմբերի 1-ից ուժի մեջ կմտնեն նաև սոյայի և ընկույզի մի քանի տեսակների մաքսատուրքերը։
Թարգմանությունը՝ Էմմա Չոբանյանի
