Երբ և ինչպես կներդրվեն կենսաչափական նոր անձնագրերը. ՏԵՍԱՆՅՈՒԹ

2026 թվականի երկրորդ կիսամյակից Հայաստանում կարտադրվեն նոր նմուշի կենսաչափական անձնագրեր և նույնականացման քարտեր։ Մեկ շաբաթ առաջ Ներքին գործերի նախարարությունը հայտնեց՝ համակարգի ներդրման մրցույթի հաղթողը ֆրանսիական IDEMIA կոնսորցիումն է: Պայմանագիրը երկկողմ ընդունելի է․ առաջիկա ամսվա ընթացքում օր և վայր կընտրվի այն ստորագրելու համար։

ՆԳՆ Միգրացիայի և քաղաքացիության ծառայության պետ Նելլի Դավթյանը վստահ է՝ հանրային ծառայությունների մատուցման բոլորովին նոր կոնցեպտ է ներդրվելու։

ՀՀ քաղաքացու անձնագրի մասին օրենքի համաձայն՝ կենսաչափական տվյալներ են համարվում օրենքով սահմանված կարգով հավաքվող, պահպանվող և օգտագործվող անհատական տվյալները, որոնք բնութագրում են քաղաքացու ֆիզիոլոգիական առանձնահատկությունները և հնարավորություն են տալիս քաղաքացուն նույնականացնել լուսանկարի, մատնահետքի, ստորագրության միջոցով։

Կառավարությունն այս պահին դեռևս չի հայտարարում, թե որքան կարժենա նոր կենսաչափական անձնագրի տրամադրումը, հաղթող ընկերությունն իր գնային քաղաքականության մասին կհայտարարի պայմանագրի ստորագրումից հետո։ Մասնավոր ընկերությունը իրավասու չի լինի որևէ տեսակի դիմում վերցնել մինչև Միգրացիայի և քաղաքացիության ծառայությունը բնակչության պետական ռեգիստրում չներմուծի անձի տվյալները՝ իրավական կարգավիճակը որոշված։

Մինչև փաստաթղթերի արտադրությունը նախատեսվում է ենթակառուցվածքների ներդրում՝ շենքային պայմանների ստանդարտացում, գրասենյակների հիմնում, տեխնիկական վերազինում և այլն։ Այս ամենը հաղթող կոնսորցիումը պարտավորվել է իրականացնել առաջիկա մեկ տարվա ընթացքում։

Ըստ Միգրացիայի և քաղաքացիության ծառայության պետի՝ գործընթացը կարևոր է նաև վիզաների ազատականացման համատեքստում։ Նելլի Դավթյանը նշում է՝ Հայաստանի և ԵՄ-ի միջև վիզային ռեժիմի ազատականացման գործընթացը կարող է 4-ից 5 տարի տևել։

Նոր տիպի կենսաչափական տվյալներ պարունակող անձնագրերի համակարգը ՀՀ-ում ներդրվել էր դեռևս 2012 թվականին։ 2017-ի հունվարի 1-ին ավարտվեց Հայաստանի Հանրապետության կենսաչափական անձնագրերի և նույնականացման քարտերի համակարգը սպասարկող և բլանկներ մատակարարող լեհական ընկերության հետ կնքված պայմանագրի ժամկետը։ Դրանից հետո կառավարությունը շարունակաբար հետաձգում էր նոր տեսակի կենսաչափական անձնագրերի տրամադրումը:

Մանրամասները՝ տեսանյութում։

Անի Թամրազյան