Թուրքիան ցանկանում է հասնել Թրամփի սահմանած մաքսատուրքերի չեղարկմանը

Թուրքիայի առևտրի նախարար Օմեր Բոլաթը հայտարարել է, որ մայիսին ԱՄՆ կատարած այցի ընթացքում ամերիկացի պաշտոնյաների հետ քննարկումներ կունենան նախագահ Դոնալդ Թրամփի սահմանած մաքսատուրքերը չեղարկելու վերաբերյալ, գրում է Turkiye today-ը։

Թուրքիայի նկատմամբ սահմանվել են 10 տոկոս մաքսատուրքեր։

«Մայիսի կեսերին ես կմասնակցեմ Վաշինգտոնում կայանալիք թուրք-ամերիկյան համաժողովին և պաշտոնական հանդիպումներ կանցկացնեմ ԱՄՆ առևտրի նախարարի ու առևտրային ներկայացուցչի հետ՝ քննարկելու մեր համաձայնեցված նպատակներին համահունչ համատեղ գործողությունների ծրագիրը»,- ասել է նա։

X-ի միկրոբլոգում գրառման մեջ էլ Բոլաթը մեկնաբանել է մաքսատուրքերը որպես «երկու չարիքից փոքրագույնը»՝ դրանք բնութագրելով որպես ԱՄՆ ներքին արդյունաբերությունը վերակենդանացնելու, առևտրի դեֆիցիտը նվազեցնելու և օտարերկրյա ներդրումներ ներգրավելու փորձ։ Նա հավելել է՝ ակնկալվում է, որ միջոցառումները կարագացնեն համաշխարհային մատակարարման շղթաներում շարունակվող տեղաշարժը:

Բոլաթն ընդգծել է, որ Թուրքիան հունվարից ուշադիր հետևում է ԱՄՆ վարչակազմի ընդունած որոշումներին և երկխոսություն է պահպանում ամերիկացի գործընկերների հետ բոլոր մակարդակներում։ Վերջին հանդիպման ժամանակ, ըստ թուրք պաշտոնյայի, կողմերը քննարկել են առևտրային և տնտեսական հարաբերությունների ճանապարհային քարտեզը, անդրադարձել են առևտրի հետ կապված մարտահրավերներին և ուսումնասիրել ավելի խորը համագործակցության հնարավոր ոլորտները:

«2024 թվականին ԱՄՆ-ին բաժին է ընկել Թուրքիայի ընդհանուր արտահանման 6,2%-ը՝ դարձնելով այն մեր երկրորդ արտահանման շուկան: Մենք կշարունակենք աշխատել առանց ընդհատումների՝ հասնելու 100 միլիարդ դոլարի առևտրի ծավալի թիրախին»,- նշել է նա։

Թարգմանությունը՝ Էմմա Չոբանյանի