Վարչապետը մեզ դրեց փաստի առաջ․ Արմեն Աշոտյանը մանրամասներ հայտնեց երեկվա բանակցություններից․ ՏԵՍԱՆՅՈՒԹ

Մենք երեկ վարչապետից անձամբ լսել ենք նրա կարծիքները և հայտնել, որ  բանակցություններ անցկացնելու մեր քաղաքական ձևաչափը հետևյալն է՝ Նիկոլ Փաշինյան-ԱԺ երեք խմբակցություններ։ Այս մասին այսօր Ազգային ժողովում լրագրողների հետ զրույցում ասաց ԱԺ ՀՀԿ խմբակցության պատգամավոր Արմեն Աշոտյանը։

Հարցին՝ ինչո՞ւ են հրաժարվել հուշագրի ստորագրումից, Արմեն Աշոտյանն ասաց․ «Բառերի ճշգրտությամբ պետք է խոսենք այս մասին։ Երեկ եղել են առաջարկություններ, ըստ որոնց, եթե ուզում ենք հուշագիր ստորագրենք, ապա ընտրությունների ժամկետի մասին էլ պետք է քննարկենք, ամենատարածված փոխզիջումային տարբերակը, որը առաջարկում էր վարչապետը, այն էր, որ տեղափոխենք ընտրությունները մայիսին,  պատշաճ փոխենք ԸՕ, տեղեկացնենք Վենիետիկի հանձնաժողովին։ Այդ գործողությունները կաևրող էին լինել ընդհանուր քննարկված փաթեթի մաս։ Վարչապետն ասաց, որ ամեն ինչի մասին կարող է խոսել, բացի դեկտեմբերից»։

Արմեն Աշոտյանը նշեց, որ Ընտրական օրենսգրքի նախագիծը դեռ չի առաքվել Ազգային ժողով, չի անցել միջազգային փորձաքննություն, ընդամենը տրվել են առաջարկություններ և այն, որ ամառը 3-4 նիստով տեղի է ունեցել, դա դեռ չի նշանակում, որ այն պատրաստ է։

Հարցին՝ ինչո՞ւ երեկ երեկոյան հապճեպությամբ ընդունվեց վիճահարույց  այդ օրինագիծը, Արմեն Աշոտյանն ասաց․ «Օրինագիծը հապճեպ չի քվեարկվել։ Վարչապետը մտել է բանակցությունների մեր խմբակցության ղեկավարի և ԱԺ նախագահի հետ: Նրան ասել են, որ եթե ուզում են բանակցությունները շարունակեն, իրենք ցերեկը չեն քվեարկի այս օրինագծի համար, այդ ընթացքում սակայն, վարչապետը պետք է գար բանակցությունների նոր ռաունդի, սակայն, փոխարենն ասել է, որ բանակցություններ չեն լինելու, իր վրա հույս չդնենք և ընտրությունները պետք է լինեն դեկտեմբերին։ Այսինքն՝ օրինագծի քվերակությունը ցերեկը տեղի չունեցավ, այն հետաձգվեց, որ բանակցություններ լինեն, իսկ վարչապետը մեզ դրեց փաստի առաջ»։

Ի դեպ Արմեն Աշոտյանը հայտարարեց, որ կեսօրից հետո ՀՀԿ-ի անունից հայտարարություն կտարածվի, որտեղ ընդհանրական գնահատականներ կտան երեկվա իրադարձություններին ու վարչապետի հետ հանդիպմանը:

Մանրամասները՝ տեսանյութում։