Հուսամ՝ բանտում իմ մահը կօգնի ճնշում գործադրել Ալիևի հանցավոր ռեժիմի վրա․ ադրբեջանցի ընդդիմադիր գործիչը հացադուլ է հայտարարել

Ադրբեջանի «Մուսավաթ» կուսակցության անդամ, բանտարկված ընդդիմադիր գործիչ Թոֆիգ Յագուբլուն հայտարարել է ապրիլի 1-ից հացադուլ սկսելու մասին։ Նրա դուստր Նիգյար Հազին իր ֆեյսբուքյան էջում կիսվել է հոր հայտարարությամբ։

«Ապրիլի 1-ից հացադուլ եմ սկսում՝ ի նշան բողոքի 9 տարվա ազատազրկման անհիմն, անօրինական և անբարոյական դատավճռի դեմ։ Գիտեմ, որ շատ դժվար է լինելու, և ընկերներիցս շատերը հավանություն չեն տալիս իմ որոշմանը, սակայն ես վճռական եմ դա անել։ Հիմա ես 65 տարեկամ եմ։ Իլհամ Ալիևի ծրագրի համաձայն՝ 74 տարեկանում պետք է ազատվեմ բանտից։ Այնուամենայնիվ, ոչ մի երաշխիք չկա, որ ես այդքան երկար կապրեմ, հատկապես՝ բանտային պայմաններում։ Մյուս կողմից, եթե անգամ բանտում չմեռնեմ, ինչո՞ւ պետք է կյանքիս վերջին տարիները անցկացնեմ բանտում։ Ինձ զրպարտել և անարդարացիորեն բանտարկել են կեղծ մեղադրանքներով։ Բոլորը գիտեն, որ ինձ կալանավորել են քաղաքական գործունեության համար»,- նշել է Յագուբլուն։

Նա հայտարարել է, որ այժմ գտնվում է ռազմական օդաչուի պայմաններում՝ առանց կատապուլտի հնարավորության, որի ինքնաթիռը խոցել են։

«Ինքնաթիռը, ամեն դեպքում, կընկի անտառում, դաշտում կամ լեռներում։ Այսպիսով, եթե այն ավարտվի մահով, ավելի լավ չի՞ լինի կործանված ինքնաթիռով հարվածել  թշնամու ռազմաբազային։ Ի՞նչը թույլ կտա այդ օդաչուին ապրել ևս 15-30 րոպե։ Դրա համար ես որոշել եմ մեռնել բանտում։ Հուսով եմ, որ իմ մահը բանտում կարող է ստիպել միջազգային հանրությանը ուշադրություն դարձնել Ադրբեջանի վրա և ավելի լուրջ ճնշում գործադրել Ալիևի հանցավոր ռեժիմի վրա։ Եթե ​​ցանկանում եք աջակցել ինձ, խնդրում եմ, կարդացեք իմ վերջին խոսքերը դատարանում և տարածեք դրանք: Այսպիսով, և՛ դուք, և՛ մյուսները կունենաք չափազանց ամուր և անհերքելի փաստարկներ և ապացույցներ՝ քննադատելու և մերկացնելու Ալիևի ռեժիմի դատական ​​համակարգը»,- ասել է Յագուբլուն։

Հիշեցնենք, որ ադրբեջանցի ընդդիմադիր գործիչը դատապարտվել է 9 տարվա ազատազրկման։ Նա Ադրբեջանի նախագահ Իլհամ Ալիևի կոշտ քննադատներից է և, ընդհանուր առմամբ, 8 անգամ ձերբակալվել է։

Թարգմանությունը՝ Էմմա Չոբանյանի