Իմամօղլուն դժգոհել է իր ձերբակալության հետ կապված Արևմուտքի «ոչ բավարար արձագանքից»

Ստամբուլի ընդդիմադիր քաղաքապետ Էքրեմ Իմամօղլուն, որը մարտի 19-ին ձերբակալվել է քաղաքապետարանի մի շարք պաշտոնյաների հետ, ապա կալանավորվել, բանտից հոդված է գրել ամերիկյան New York Times պարբերականի համար՝ «Ես Թուրքիայի նախագահի գլխավոր մրցակիցն եմ, ինձ կալանավորել են» վերնագրով։

Իմամօղլուն գրել է, որ ինքը Թուրքիայի նախագահ Ռեջեփ Թայիփ Էրդողանի հիմնական մրցակիցն է, այդ իսկ պատճառով իրեն ձերբակալել են։

«Երբ նախագահ Ռեջեփ Թայիփ Էրդողանը հասկացավ, որ չի կարող ինձ հաղթել ընտրություններում, դիմեց այլ մեթոդների։ Նա հաղթեց իր հիմնական քաղաքական մրցակցին՝ ինձ։ Ինձ հեռացրել են ընտրված պաշտոնից ֆինանսական մեղադրանքների պատճառով»,- գրել է Իմամօղլուն՝ ընդգծելով, որ ձերբակալվել է անհիմն մեղադրանքներով։

Նա հավելել է, որ Էրդողանի ռեժիմն աստիճանաբար վերացնում է ժողովրդավարական վերահսկողության մեխանիզմները։

«Նա լռեցնում է լրատվամիջոցներին, ընտրված քաղաքապետերին փոխարինում է հոգաբարձուներով, չեզոքացնում է օրենսդիր մարմինը, վերահսկում է դատական ​​համակարգը և շահարկում ընտրությունները: Վերջին ամիսներին ցուցարարների և լրագրողների զանգվածային ձերբակալությունները հստակ ուղերձ են հղել՝ ոչ ոք ապահով չէ։ Քվեները կարող են անվավեր ճանաչվել, ազատությունները մի ակնթարթում ձեզանից կարող են խլել։ Էրդողանի իշխանության տակ գտնվող հանրապետությունը վերածվել է վախի հանրապետության»,- նշել է նա։

Ըստ Իմամօղլուի՝ Թուրքիայի ժողովուրդը հավաքվել է ավելի լավ ապագա և արդարություն խոստացող թեկնածուի շուրջ, և որ բողոքի ալիքը տարածվել է ամբողջ երկրով։

Էքրեմ Իմամօղլուն նաև դժգոհել է, որ արևմտյան երկրները, որոնք կարևորում են այնպիսի արժեքներ, ինչպիսիք են ժողովրդավարությունը և մարդու իրավունքները, բավարար չեն արձագանք իր կալանավորմանը։

«Չնայած ճնշումներին՝ համերաշխության օրինակները շարունակվում են։ Սոցիալ-դեմոկրատ առաջնորդներն ու քաղաքապետերը Թուրքիայում և ամբողջ աշխարհում՝ Ամստերդամից մինչև Զագրեբ, իմ ձերբակալությունից հետո քաջությամբ և սկզբունքայնությամբ իրենց աջակցությունը ցուցաբերեցին: Քաղաքացիական հասարակությունը նույնպես հետ չի կանգնել, բայց կենտրոնական կառավարությունների լռությունը խլացուցիչ է։ Վաշինգտոնը միայն մտահոգություն է հայտնել «վերջին ձերբակալությունների և բողոքի ցույցերի վերաբերյալ»։ Եվրոպական առաջնորդները, մի քանի բացառություններով, խիստ չեն արձագանքել»,- գրել է ընդդիմադիր քաղաքական գործիչը՝ հավելելով, որ վերջին զարգացումները, ներառյալ՝ Ռուսաստանի պատերազմն Ուկրաինայում, Ասադի վարչակարգի տապալումը Սիրիայում և ավերածությունները Գազայում, մեծացրել են Թուրքիայի ռազմավարական նշանակությունը, և դա ավելի ակնհայտ է դառնում, հատկապես, երբ հաշվի են առնվում եվրոպական անվտանգությանը նպաստելու՝ Անկարայի կարողությունները:

Թարգմանությունը՝ Էմմա Չոբանյանի