Պատմության ուսուցչուհին հակափաստարկ չունի. Արմավիրի մարզպետարանի արձագանքը` Մերձավանի դպրոցի դասադուլին

«Մերձավանի դպրոցում դասադուլավոր ուսուցիչները, ծնողները, երեխաները և պատմության ուսուցչուհին որևէ կերպ չեն կարող համաձայնության եզր գտնել և աշխատել։ Դպրոցում հստակ խնդիր կա, որը, հուսով ենք, շուտով, ըստ ընթացակարգի, կհանգուցալուծվի»,- Factor TV-ի հետ զրույցում նշեց Արմավիրի մարզպետի օգնական Մանվել Մելիքյանը՝ անդրադառնալով այսօր վաղ առավոտից Մերձավանի միջնակարգ դպրոցում մեկնարկած դասադուլին։

Հիշեցնենք՝ ուսուցիչները, ծնողներն ու աշակերտները դժգոհում են նույն դպրոցի պատմության ուսուցչուհի Ռոզա Դավթյանից։ Նրանց պնդմամբ՝ Դավթյանն արդեն 6 ամիս դասավանդում է դպրոցում և ուսուցչին ոչ հարիր վարք է դրսևորում․  վիրավորում է աշակերտներին, ուսուցչական կազմին, ոչ պատշաճ կերպով է արտահայտվում արցախցիների մասին:

Մարզպետի օգնականը նշեց, որ վերջին 2-3 ամսվա ընթացքում Արմավիրի մարզպետարանի ներկայացուցիչները պարբերաբար այցեր են կազմակերպել դպրոց։ Ապա հավելեց՝ մեկ անգամ չէ, որ այնտեղ խախտվել է դասապրոցեսը․

«Ներկայացված մեղադրանքներին Ռոզա Դավթյանը որևէ հակափաստարկ բերել չի կարողանում, միայն ասում է, թե դասադուլավորները ստում են և զրպարտում իրեն։ Բայց փաստը մնում է փաստ, որ դասապրոցեսը խաթարված է, դպրոցում են նաև ոստիկանության ներկայացուցիչներ»:

Մանվել Մելիքյանը շեշտեց` Ռոզա Դավթյանը երեք նկատողություն  է ստացել, սակայն երրորդ նկատողությունն արվել է ընթացակարգի խախտմամբ և աշխատանքից հեռացվելուց հետո կրկին կարողացել է վերականգնվել  նույն հաստիքում։

«Տնօրինությունն իրավունք ունի դարձյալ նկատողությունը տալու, և եթե բանը նորից հասնի դրան և դա ճիշտ ընթացակարգով արվի, Դավթյանը կհեռացվի: Մեր նպատակը դասապրոցեսի բնականոն հունը ապահովելն է, և մենք չենք կարող աչք փակել խախտում արձանագրելու դեպքում: Հուսանք` դպրոցում ծագած խնդիրը շուտով հանգուցալուծում կստանա»,- եզրափակեց մարզպետի օգնականը:

Աննա Բաբաջանյան