Քաղաքականություն
27.03.2025 | 15:12ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է ՀՀ ԱԺ նախագահ Ալեն Սիմոնյանի այն հայտարարություններին, որ Երևանը չի պատրասվում վերադառնալ հաղորդակցությունների ապաշրջափակման հարցով ՀՀ-Ադրբեջան-ՌԴ եռակողմ ձևաչափին։
Նա նախ հիշեցրել է, որ ապաշրջափակման հարցի քննարկումը երեք երկրների ղեկավարները հանձնարարել են փոխվարչապետներին։
«Հայաստանում այդ հարցով ոչ թե ձեր կողմից նշված պետական գործիչն է զբաղվում, այլ ուրիշ անձ։ Դրա համար պետք է Երևանին դիմել՝ արդյո՞ք փոխվել են տեղերով, պետք է դիմել այն անձին, որը պատասխանատու է այդ ուղղության համար։ Չեմ ուզում մեկնաբանել կոնկրետ մարդու կոնկրետ հայտարարությունը։ Մենք ելնում ենք նրանից, որ դա նրա իրավասության շրջանակում չէ»,- ասել է նա։
Զախարովան նշել է, որ խնդրի լուծման համար ստեղծվել է աշխատանքային խումբ Հարավային Կովկասում տրանսպորտային ու տնտեսական կապերի ապաշրջափակման համար, մեծ աշխատանք է տարվել՝ համաձայնեցնելու իրավական ու տեխնիկական պարամետրերը Հայաստանի ու Ադրբեջանի միջև՝ հիմնված փոխադարձության և սուվերենության վրա։
«Մենք տեսնում ենք արևմտյան երկրների ապակառուցողական ազդեցություն, երբեմն ՀՀ իշխանությունների դիրքորոշումը առաջացնում է հարցեր։ Այդ երկու գործոններով համագործակցությունը դադարել է»,- նշել է նա։
Միաժամանակ, Զախարովան հրաժարվել է մեկնաբանել Ալեն Սիմոնյանի հայտարարությունները ՀԱՊԿ-ի հետ կապված, որ Հայաստանը չի վերադառնա կազմակերպության հետ նախկին գործակցությանը։
«Ի՞նչ կարելի է մեկնաաբանել, ավելի լավ է՝ պաշտոնական Երևանը մեկնաբանի։ Դրանից հետո կհասկանանք, թե ինչի հետ գործ ունենք՝ անձնակա՞ն, թե՞ պետական դիրքորոշման»,- հայտարարել է Զախարովան։
Մանրամասները՝ տեսանյութում։
Էմմա Չոբանյան
