Պեսկովը հայտնել է Ռիադում ընթացող ԱՄՆ-ՌԴ բանակցությունների օրակարգը

Էր Ռիադում Ռուսաստան-ԱՄՆ բանակցություններում քննարկվում է Սևծովյան նախաձեռնությունը, հայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է Ինտերֆաքսը։

«Այսօր օրակարգում է Սևծովյան նախաձեռնությունը և բոլոր ասպեկտները, որոնք կապված են այս նախաձեռնության վերսկսման հետ: Սա նախագահ Թրամփի առաջարկն էր, և նախագահ Պուտինը համաձայնել է դրան: Հենց այս մանդատով է մեր պատվիրակությունը մեկնել Էր Ռիադ»,- լրագրողներին ասել է Պեսկովը:

Պեսկովը պարզաբանել է, որ Սևծովյան նախաձեռնության շրջանակում քննարկվում է, առաջին հերթին, «նավագնացության անվտանգությունը»։

«Սակայն, եթե հիշում եք, իր նախկին տեսքով այնտեղ մեր երկրի հանդեպ ստանձնած պարտավորությունների բավականին մեծ մաս կար, որոնք, ի դեպ, անցյալ անգամ չկատարվեցին: Հետևաբար, դա նույնպես կլինի այսօր օրակարգում»,- ասել է նա՝ նշելով, որ «այդ շփումների արդյունքների մասին տեղեկատվությունն անմիջապես կզեկուցվի պետության ղեկավարին»։

Կրեմլի ներկայացուցիչը նաև ասել է, որ Ռուսաստանն ու ԱՄՆ-ն ունեն իրական ընդհանուր ցանկություն և պատրաստակամություն՝ գնալու Ուկրաինայում իրավիճակի խաղաղ կարգավորման ճանապարհով։

«Ըստ ամենայնի, խոսքը երկրների ցանկության և պատրաստակամության մասին է՝ գնալ խաղաղ կարգավորման ճանապարհով, այստեղ իսկապես կա ընդհանուր ըմբռնում։ Ինչ վերաբերում է տեխնիկական հարցերին, ապա գիտեք, որ տեխնիկական հարցերի որոշակի մասի, այսպես ասած, թեմաներից մեկի շուրջ այսօր Էր Ռիադում բանակցություններ են ընթանում մեր և ամերիկյան պատվիրակությունների միջև»,- հայտարարել է Պեսկովը՝ մեկնաբանելով ԱՄՆ նախագահ Դոնալդ Թրամփի հայտարարությունը, թե արդեն կան Ուկրաինայի վերաբերյալ գործարքի ուրվագծերը։ Նա նշել է, որ «իհարկե, կան շատ ու շատ տարբեր ասպեկտներ, որոնց վրա պետք է աշխատել»։

Հավելենք՝ Սաուդյան Արաբիայում մեկնարկել են ՌԴ և ԱՄՆ պատվիրակությունների բանակցությունները։ Նախօրեին էլ այստեղ տեղի էին ունեցել ԱՄՆ-Ուկրաինա բանակցությունները։

Թարգմանությունը՝ Էմմա Չոբանյանի