Սահմանադրության փոփոխություն, Մինսկի խմբի վերացում, ԵՄ դիտորդների հեռացում․ Ալիևի ներկայացուցիչը՝ խաղաղության հաստատման Բաքվի պահանջների մասին

Ադրբեջանը պատրաստ է խաղաղության պայմանագիր կնքել Հայաստանի հետ՝ վերջ դնելու երկարամյա ճգնաժամին։ Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը Արգենտինա կատարած այցի ժամանակ։

Ամիրբեկովը հաստատել է, որ Հայաստանն ու Ադրբեջանը մոտ են պատմական համաձայնագրի կնքմանը։ Նա, միաժամանակ, Բաքվի նախապայմաններն է հնչեցնել՝ նշելով, թե Հայաստանի կողմից սահմանադրական բարեփոխումներն անհրաժեշտ քայլ են կայուն խաղաղության հաստատման համար։

«Հայաստանի Հանրապետության հիմնական օրենքն իր ներկայիս տեսքով տարածքային պահանջներ է պարունակում Ադրբեջանի նկատմամբ: Մենք կցանկանայինք, որ այդ պահանջները բացառվեին Հայաստանի Սահմանադրությունից, քանի որ եթե դրանք մնան, կարող են լուրջ վտանգ ներկայացնել ապագա խաղաղության  համար: Մենք չենք ցանկանում որևէ իրավական հիմք թողնել՝ ապագայում հայերի կողմից մեր տարածքների նկատմամբ պահանջներ ներկայացնելու հնարավոր փորձերի համար։ Ուստի հիմա գնդակը Հայաստանի դաշտում է»,- հայտարարել է Ամիրբեկովը։

Բացի այդ, ըստ Ալիևի ներկայացուցչի, խաղաղության համաձայնագրի ստորագրման համար անհրաժեշտ է լուծարել ԵԱՀԿ Մինսկի խումբն ու համապատասխան կառույցները։

«Հայաստանի և Ադրբեջանի պայմանական սահմանին պարեկություն իրականացնող եվրոպական զինված ուժերը նույնպես ստիպված կլինեն լքել մեր տարածաշրջանը։ Մենք խորապես համոզված ենք, որ մեր հարաբերությունների ապագան Ադրբեջանի և Հայաստանի ձեռքերում է, և այս հարցում որևէ երրորդ կողմի կարիք չկա, դրսի ուժերի կարիք չկա»,- ասել է ադրբեջանցի պաշտոնյան։

Նա նաև հայտարարել է, թե Ադրբեջանի և Հայաստանի միջև հակամարտությունը չպետք է ազդի Արգենտինայի հետ հարաբերությունների վրա։

«Արգենտինան հիանալի հարաբերություններ ունի Հայաստանի հետ, բայց դա չի նշանակում և չպետք է նշանակի, որ Արգենտինան չի կարող հիանալի հարաբերություններ ունենալ Ադրբեջանի հետ»,- ասել է Ամիրբեկովը։

Թարգմանությունը՝ Էմմա Չոբանյանի