13.03.2026 | 14:57
ԱՄՆ-ը զգուշացնում է իր քաղաքացիներին՝ վերանայել Ադրբեջան ուղևորության ծրագրերը
Ադրբեջանի ԱԳՆ-ն արձագանքել է Արարատ Միրզոյանին
Քաղաքականություն
21.03.2025 | 12:51
Ադրբեջանի ԱԳՆ-ն արձագանքել է ՀՀ ԱԳ նախարար Արարատ Միրզոյանի՝ Բրազիլիայում իր գործընկեր Մաուրո Վիեյրայի հետ մամուլի ասուլիսում հնչեցրած հայտարարություններին։ Մասնավորապես, Ադրբեջանի ԱԳՆ խոսնակ Այխան Հաջիզադեն ասել է, թե պաշտոնական Բաքուն դատապարտում է Արարատ Միրզոյանի հնչեցրած «անհիմն պնդումները»։
«Ցավոք, խաղաղության համաձայնագրի ստորագրմանը խոչընդոտող խնդիրները վերացնելու փոխարեն՝ հայկական կողմը զբաղված է մանիպուլյացիաներով՝ Ադրբեջանին ներկայացնելով որպես խաղաղությամբ չշահագրգռված երկիր»,- ասվում է Ադրբեջանի ԱԳՆ խոսնակի հայտարարության մեջ։
Նշվում է, թե, իբր, «Ադրբեջանը երբեք ագրեսիվ քաղաքականություն չի վարել Հայաստանի նկատմամբ և շահագրգռված չի եղել ստեղծել իրավիճակ, որը տարածաշրջանը կվերածի հակամարտության գոտու»։
«Նույնիսկ Հայաստանի արտգործնախարարի հայտարարությունն այն մասին, որ Երևանը համաձայնել է խաղաղության համաձայնագրի նախագծի վերջին տարբերակին՝ ճանապարհ բացելով նախագծի շուրջ բանակցությունների ավարտին, ցույց է տալիս, թե ինչպես է այս երկիրը խոչընդոտում գործընթացը՝ վերջին երկուսուկես տարիների ընթացքում անընդունելի առաջարկներ ներկայացնելով։ Հենց ադրբեջանական դիվանագիտությունն ու միջոցները թույլ տվեցին ավարտին հասցնել տեքստի շուրջ բանակցությունները»,- նշում է պաշտոնական Բաքուն։
Ադրբեջանի ԱԳՆ-ն հայտարարում է, որ «դա ոչ մի կերպ չի նշանակում, որ անտեսելու են Հայաստանի շարունակական պահանջները Ադրբեջանի տարածքային ամբողջականության և ինքնիշխանության նկատմամբ՝ ամրագրված նրա Սահմանադրությամբ, ինչպես նաև Հայաստանի գործողությունները՝ պաշտպանելու Մինսկի խումբը և ԵԱՀԿ համապատասխան կառույցները, որոնք անցյալ հակամարտության մասունքներ են»։
«Երբ Հայաստանի արտգործնախարարը և այլ պաշտոնյաներ հայտնում են, որ Ադրբեջանը դրական չի արձագանքել հաղորդակցության և «զենքի վերահսկման մեխանիզմների» վերաբերյալ իրենց առաջարկներին, թվում է, որ հայկական կողմը կա՛մ չի հետևում այս հարցում Ադրբեջանի ԱԳՆ մեկնաբանություններին, կա՛մ տառապում է ուրիշներին ծաղրելու, ուշադրություն գրավելու, շահարկելու ցանկությամբ»,- ասվում է ադրբեջանական կողմի հայտարարության մեջ։
Բաքուն անդրադարձել է նաև Ադրբեջանում ապօրինի պահվող հայ գերիների շինծու գործերով դատավարություններին և նրանց ազատ արձակելու կոչերին՝ նշելով, թե «Ադրբեջանի անօտարելի իրավունքն ու պարտականությունն է հետաքննել և հետապնդել հանցագործությունները Ժնևի կոնվենցիաներին ու միջազգային իրավունքին, ներքին օրենքներին համապատասխան»։
«Եթե Հայաստանն իսկապես շահագրգռված է առկա հումանիտար խնդիրների լուծմամբ, ապա պետք է ապահովի Հայաստանից վտարված ադրբեջանցիների՝ անվտանգ և արժանապատիվ իրենց տները վերադառնալու իրավունքը, տեղեկատվություն տրամադրի մոտ 4000 անհետ կորած ադրբեջանցիների գտնվելու վայրի մասին և համագործակցի ականների քարտեզների տրամադրման հարցում»,- ասվում է հայտարարության մեջ։
Թարգմանությունը՝ Էմմա Չոբանյանի
