19.02.2026 | 12:03
Կառավարության անդամների ճեպազրույցները. ՈՒՂԻՂ
Էրդողանը խոսել է Ստամբուլի ընդդիմադիր քաղաքապետի ձերբակալության մասին
Քաղաքականություն
21.03.2025 | 12:36
Թուրքիայի նախագահ Ռեջեփ Թայիփ Էրդողանը խախտել է լռությունն ու անդրադարձել Ստամբուլի ընդդիմադիր քաղաքապետ Էքրեմ Իմամօղլուի ձերբակալությանը։ Նա Իմամօղլուի դիպլոմը չեղարկելու և ձերբակալելու գործընթացի հետ կապված հայտարարության մեջ թիրախավորել է ընդդիմությանը, գրում է Birgun-ը։
«Ընդդիմության՝ իր ներքին հակասությունները կամ օրենքի հետ ունեցած խնդիրները որպես երկրի կարևորագույն խնդիր ներկայացնելու ջանքերը կեղծավորության գագաթնակետն են։ Նրանք նաև տեղյակ են, որ այս տեղեկատվության և փաստաթղթերի մեծ մասն ուղղակիորեն փոխանցվել է դատական համակարգին իրենց իսկ կուսակիցների կողմից՝ կապված Ստամբուլի քաղաքապետարանի դեմ գործողության հետ։ Մեր ընդդիմությունը կարծում է, որ բոլորը կույր են ու հիմար, ուստի իրենց սխալներն ավելի մեծ սխալներով են պաշտպանում»,- հայտարարել է Թուրքիայի նախագահը։
Նա ասել է, թե ընդդիմությունը կորցրել է հավասարակշռությունն այն աստիճան, որ հարձակվում է ոստիկանների վրա և սպառնում դատավորներին, դատախազներին ու դատարաններին։
«Մենք ժամանակ չունենք ծախսելու ընդդիմության տեսարանների վրա՝ թե՛ անձամբ, թե՛ որպես կուսակցություն, թե՛ որպես դաշինք»,- հայտարարել է Էրդողանը։
Ըստ փորձագետների՝ Իմամօղլուն Թուրքիայի նախագահ Ռեջեփ Թայիփ Էրդողանի ամենաուժեղ քաղաքական մրցակիցն է առաջիկա նախագահական ընտրություններում։ Հաջորդ նախագահական և խորհրդարանական ընտրությունները Թուրքիայում նախատեսվում է անցկացնել 2028 թվականին, սակայն վերջին շրջանում ընդդիմությունը, նաև իշխանական աղբյուրները հաճախ են խոսում արտահերթ ընտրությունների անցկացման մասին։ Փորձագետները նշում են, որ այժմ Էրդողանը փորձում է ազատվել իր գլխավոր մրցակցից՝ տարբեր մեթոդներով թույլ չտալով, որպեսզի նա մասնակցի ընտրություններին։
Թարգմանությունը՝ Էմմա Չոբանյանի
