Թրամփը Իրանին սպառնացել է «սարսափելի հետևանքներով», եթե հութիների հարձակումները չդադարեն

ԱՄՆ նախագահ Դոնալդ Թրամփը նախազգուշացրել է Իրանին, որ Թեհրանը կբախվի «սարսափելի հետևանքների», եթե Եմենի հութիները շարունակեն հարձակումները միջազգային նավագնացության ուղիների վրա, գրում է BBC-ն։

Նա նշել է, թե Իրանի ղեկավարությունը պատասխանատվություն կկրի «հութիների կողմից արձակված յուրաքանչյուր կրակոցի համար», որոնց երկար ժամանակ աջակցում է Թեհրանը: Խումբը հայտնել է, որ վերջին երկու օրվա ընթացքում երեք անգամ թիրախավորել է ամերիկյան ավիակիրը:

Հութիները կիրակի Կարմիր ծովում առաջին անգամ փորձել էին հարձակվել USS Harry S Truman նավի վրա՝ Եմենում ԱՄՆ-ի մահացու հարվածներից հետո:

Պենտագոնը հայտարարել է, որ շաբաթ օրվանից ի վեր հարվածներ է հասցրել Եմենում 30 թիրախների, ինչն ԱՄՆ-ի ամենամեծ ռազմական գործողությունն է Մերձավոր Արևելքում այն ​​բանից հետո, երբ Թրամփը վերադարձել է Սպիտակ տուն:

«Հութիների արձակած յուրաքանչյուր կրակոց այս կետից կդիտարկվի որպես կրակոց, որն արձակվել է Իրանի զենքից և ղեկավարությունից:Եվ Իրանը պատասխանատվություն կկրի, կկրի դրա հետևանքները, և այդ հետևանքները կլինեն սարսափելի»,- գրել է Թրամփը Truth Social-ում։

ԱՄՆ նախագահը մեղադրել է Իրանին խմբավորմանը ֆինանսավորում, զենք և հետախուզական տվյալներ մատակարարելու մեջ, ինչը Թեհրանը հերքում է։

ՄԱԿ-ի Անվտանգության խորհրդին ուղղված նամակում ՄԱԿ-ում Իրանի ներկայացուցիչը հերքել է, որ Իրանը խախտում է Եմենի զենքի մատակարարման էմբարգոն և ասել, որ Իրանը ներգրավված չէ տարածաշրջանում ապակայունացնող որևէ գործողության մեջ: Դեսպան Ամիր Սաիդ Իրավանին ԱՄՆ-ին մեղադրել է Իրանի դեմ «անհիմն մեղադրանքներ» ներկայացնելու մեջ։

Երկուշաբթի կայացած ճեպազրույցի ժամանակ Պենտագոնի պաշտոնյաներն ասել են, թե ԱՄՆ-ի հարձակումները Եմենի վրա ուղղված են ավելի լայն թիրախների, քան նախկին նախագահ Ջո Բայդենի օրոք արտոնվածները։

Գեներալ-լեյտենանտ Ալեքս Գրինկևիչն ասել է, որ զոհերի թվում են անօդաչու թռչող սարքերի հութի փորձագետներ: Նա հավելել է, որ «քաղաքացիական բնակչության զոհերի վերաբերյալ հավաստի ցուցումներ չկան»։ Վաշինգտոնն ասում է, որ Հութիի որոշ առանցքային գործիչներ են մահացածների թվում են,թեև խմբավորումը դա չի հաստատել:

Պենտագոնի խոսնակ Շոն Փարնելն էլ ասել է, որ ԱՄՆ-ը չի ձգտում ռեժիմի փոփոխության։

«Այս արշավն անողոք է լինելու՝ նրանց հնարավորությունները խաթարելու և տարածաշրջանում նավագնացության ուղիները բացելու և մեր հայրենիքը պաշտպանելու համար»,- ասել է նա։

Հութիները հայտարարել են, որ իրենք կշարունակեն թիրախավորել Կարմիր ծովով նավագնացության ուղիները, քանի դեռ Իսրայելը չի ​​վերացրել Գազայի շրջափակումը:

Թարգմանությունը՝ Էմմա Չոբանյանի