Ուկրաինայի ԱԳ նախարարը ներկայացրել է Կիևի «կարմիր գծերը» ապագա ցանկացած բանակցություններում

Ուկրաինական կողմը պատրաստ է հրադադարին, ամերիկյան կողմը պատրաստ է։ Այս բանակցությունները ևս մեկ անգամ ցույց տվեցին, թե ով է իրականում ցանկանում խաղաղություն, և ով՝ պատերազմ։ Այս մասին հայտարարել է Ուկրաինայի ԱԳ նախարար Անդրեյ Սիբիհան ՌԲԿ Ուկրաինային տված հարցազրույցում։

«Ուկրաինան, սատարելով հրադադարի մասին ամերիկյան առաջարկը, ցույց տվեց արդար խաղաղության հասնելու իր գլոբալ հանձնառությունը։ Այսպիսով, գնդակն այժմ Ռուսաստանի դաշտում է: Սպասում ենք նրանց արձագանքին, բայց առանց պայմանների»,- ասել է նա։

Սիբիհան նաև ներկայացրել է Ուկրաինայի «կարմիր գծերը» ցանկացած ապագա բանակցություններում։

«Կան հիմնարար բաներ, որոնք չեն քննարկվում, որոնց չի կարելի անդրադառնալ։ Առաջինն Ուկրաինայի տարածքային ամբողջականությունն ու ինքնիշխանությունն է․ Ուկրաինան երբեք չի ճանաչի տարածքների օկուպացիան։ Երկրորդ՝ ոչ մի երկիր վետո չունի ուկրաինացի ժողովրդի ընտրության, որոշակի միություններին մասնակցելու հարցում Ուկրաինայի ընտրության վրա։ Դա կա՛մ Եվրամիությունն է, կա՛մ ՆԱՏՕ-ն»,- ասել է Ուկրաինայի ԱԳ նախարարը։

Երրորդը՝ Ուկրաինայի պաշտպանունակության սահմանափակումներ չեն կարող լինել, երկրի բանակի հզորության,  կարողությունների սահմանափակումներ չեն կարող լինել։ Այսպիսով, սրանք հիմնարար բաներ են, որոնց մասին գիտեն Կիևի գործընկերները: Ռուսաստանը պետք է պատասխանատվության ենթարկվի։

Ըստ Սիբիհայի՝ դրանք բոլորը համապարփակ խաղաղության տարրերն են:

Թարգմանությունը՝ Էմմա Չոբանյանի