ՌԴ երեք շրջանների արդյունաբերական օբյեկտներ ԱԹՍ-ների հարձակման են ենթարկվել

Մարտի լույս 13-ի գիշերը ուկրաինական ԱԹՍ-ները հարձակվել են Ռուսաստանի վեց շրջանների վրա։ ՌԴ Պաշտպանության նախարարության տվյալներով՝ հակաօդային պաշտպանության համակարգերը որսացել են 77 անօդաչու թռչող սարք․ 30-ը՝ Բրյանսկի շրջանի, 25-ը՝ Կալուգայի, վեցը՝ Կուրսկի և Վորոնեժի, հինգը՝ Ռոստովի և Բելգորոդի շրջանների վրա։ Անօդաչու սարքերի հարվածները հրդեհներ են առաջացրել երեք շրջանների արդյունաբերական օբյեկտներում, փոխանցում է DW-ի ռուսական ծառայությունը։

Նշվում է, որ Կալուգայի շրջանում անօդաչու թռչող սարքի հարձակումից հետո հրդեհ է բռնկվել Ձերժինսկի շրջանի արդյունաբերական ձեռնարկությունում։ Գիշերային հերթափոխի աշխատակիցներից մեկը թեթև վնասվածք է ստացել, հայտնել է նահանգապետ Վչաչեսլավ Շապշան։

Տեղի բնակիչների խոսքով՝ անօդաչու սարքերը հարձակվել են Կալուգայի բետոնի գործարանի վրա։ Շրջանի ղեկավարը նշել է նաև, որ Խվաստովիչսկի շրջանում՝ անօդաչու թռչող սարքի կործանման վայրում, վնասվել են կապի աշտարակը և էլեկտրահաղորդման գիծը։

Ռոստովի մարզի Շոլոխովի շրջանում անօդաչուի կործանումից հետո հրդեհ է բռնկվել արդյունաբերական օբյեկտի տարածքում։ Նահանգապետի պաշտոնակատար Յուրի Սլյուսարն այս կապակցությամբ հայտնել է  «լանդշաֆտային հրդեհի» մասին։ Ռոստովի իշխանությունների տվյալներով՝ տեղում ոչ ոք չի տուժել:

Վորոնեժի մարզի նահանգապետ Ալեքսանդր Գուսևն էլ մարտի 12-ի ուշ երեկոյան Տելեգրամում գրել է անօդաչու թռչող սարքի հարձակումը հետ մղելու մասին։ Ըստ նրա՝ վթարի ենթարկված անօդաչու թռչող սարքը հրդեհ է առաջացրել «ենթակառուցվածքային օբյեկտներից մեկում»։ Նա չի հստակեցրել, թե կոնկրետ ինչ օբյեկտի մասին է խոսքը։ Ավելի ուշ Գուսևը հայտնել է, որ հրդեհը մարվել է՝ նշելով, որ զոհեր չկան։

Թարգմանությունը՝ Էմմա Չոբանյանի