Քաղաքականություն
13.03.2025 | 11:26
ՌԴ նախագահ Վլադիմիր Պուտինը Կուրսկի մարզ է այցելել՝ տարածաշրջանում Ուկրաինայի զինված ուժերի գործողության մեկնարկից ի վեր առաջին անգամ, գրում է Meduza։
Կրեմլի հաղորդմամբ՝ Պուտինը խորհրդակցություն է անցկացրել Կուրսկի զորքերի խմբի հրամանատարական կետերից մեկում։ Չի հաղորդվում, թե որտեղ է այն գտնվում։ Ռուսական պետական լրատվամիջոցները տեսանյութ են հրապարակել, թե ինչպես է զինվորական համազգեստով ՌԴ նախագահը լսում ԶՈՒ Գլխավոր շտաբի պետ Վալերի Գերասիմովի զեկույցը։
Գերասիմովը հայտնել է, որ ռուսական զորքերը Կուրսկի շրջանում հարձակման ժամանակ գրավել են ավելի քան 1,100 քառակուսի կիլոմետր։ Մասնավորապես, նա ասել է, որ վերջին հինգ օրվա ընթացքում շրջանի 24 բնակավայր է ազատագրվել։ Բացի այդ, սահմանի առանձին հատվածներում ռուս զինվորականներ են մտել Սումիի շրջան։
Կուրսկի շրջանում Ուկրաինայի զինված ուժերի խմբավորումը «մեկուսացված է» և «ընթացի մեջ է նրա համակարգված ոչնչացումը», հավելել է նա։ ՌԴ գլխավոր շտաբի պետը նաև հայտարարել է, որ իբր, ուկրաինական բանակը տարածաշրջանում արդեն կորցրել է ավելի քան 67 հազար զինծառայողի։ Այս տվյալների անկախ աղբյուրից հաստատում չկա:
Վլադիմիր Պուտինն իր հերթին ասել է, որ «առաջադրանք է դրել կարճ ժամանակում ջարդել հակառակորդին» և «ազատագրել Կուրսկի մարզի ամբողջ տարածքը»։ Նրա խոսքով՝ ապագայում պետք է մտածել Կուրսկի շրջանում պետական սահմանի մոտ անվտանգության գոտի ստեղծելու մասին։ Բացի այդ, նա հայտարարել է, որ բոլոր ուկրաինացի զինվորներին, որոնք Ռուսաստանի կողմից գերի են ընկել Կուրսկի շրջանում, պետք է վերաբերվել «որպես ահաբեկիչների»։
Հավելենք, որ անցյալ շաբաթվանից տեղեկություններ են տարածվում Կուրսկի շրջանում ռուսական զորքերի առաջխաղացման մասին։ ՌԴ ՊՆ-ն էլ հայտնում է տարբեր բնակավայրերը վերահսկողության տակ վերցնելու մասին։
Ավելի վաղ էլ ռուսական կողմը հայտնել էր, որ ռուս զինվորները մտել են Կուրսկի Սուջա քաղաքի կենտրոն։ Ըստ տարբեր տեղեկությունների՝ ուկրաինական զորքերը դուրս են եկել Սուջայից։
Թարգմանությունը՝ Էմմա Չոբանյանի
