05.04.2026 | 15:46
Ազովի ծովում ցորենով բեռնված բեռնատար նավ է կործանվել. մեկ մարդ զոհվել է
Ուկրաինայի և ՌԴ-ի հարցերով Թրամփի հատուկ բանագնաց Քիթ Քելլոգը դուրս է մղվել բանակցություններից․ Politico
Քաղաքականություն
12.03.2025 | 19:37
Երբ հունվարին ԱՄՆ նախագահ Դոնալդ Թրամփը պաշտոնաթող գեներալ Քեյթ Քելլոգգին նշանակեց Ռուսաստանի և Ուկրաինայի միջև խաղաղ բանակցությունների գծով իր հատուկ բանագնաց, Կիևում և եվրոպական այլ մայրաքաղաքներում թեթևության բարձր շունչ լսվեց: Սակայն հիմա Politico-ն, վկայակոչելով ամերիկյան վարչակազմի աղբյուրներին, գրում է, որ Քելլոգը հիմնականում դուրս է մնացել բանակցություններից, իսկ մյուսները, այդ թվում՝ Թրամփի պետքարտուղար Մարկո Ռուբիոն, ազգային անվտանգության հարցերով խորհրդական Մայք Ուոլցը և Մերձավոր Արևելքի բանագնաց Սթիվ Ուիթկոֆը, ուկրաինացիների և ռուսների հետ բանակցությունների կենտրոնում են:
Սաուդյան Արաբիայում ամերիկացիների և ուկրաինացիների միջև ընթացող բանակցությունները դրա օրինակն են։
Ինչո՞ւ Ուկրաինայի հարցով Թրամփի հատուկ ներկայացուցիչը չի մասնակցում Ուկրաինայի հետ բանակցություններին: Նրա բացակայությունն ընդգծում է, թե ինչպես է նա դուրս մնացել։ Այս մասին ասել են Թրամփի վարչակազմի որոշ պաշտոնյաները, ինչպես նաև արտաքին քաղաքականության մի շարք հանրապետական փորձագետների, որոնք ոչ պաշտոնապես խորհուրդ են տալիս նախագահի թիմին:
«Քելլոգի դերը խիստ կասկածելի է։ Անհասկանալի է, թե ինչու նախագահը վերջնական որոշում չի կայացնի այս հարցում։ Չափազանց շատ առաջնորդներ, գումարած Ուիթկոֆը, փորձում են հերոսի դեր խաղալ՝ ավարտելով պատերազմը: Քելլոգը թուլանում է՝ ավելացնելով այն շփոթությունը, թե ով ինչ է անում»,- ասել է Թրամփի վարչակազմի պաշտոնյան։
Սակայն այլ պաշտոնյաներ դա վիճարկում են:
«Նախագահ Թրամփն օգտագործել է վարչակազմի մի քանի բարձրաստիճան պաշտոնյաների տաղանդները՝ օգնելու Ուկրաինայում պատերազմը խաղաղ հանգուցալուծման բերելու համար: Գեներալ Քելլոգը մնում է թիմի արժեքավոր մաս, հատկապես, քանի որ դա վերաբերում է մեր եվրոպացի դաշնակիցների հետ բանակցություններին»,- ասել է Սպիտակ տան ազգային անվտանգության խորհրդի խոսնակ Ջեյմս Հյուիթը:
Սպիտակ տան խոսնակ Աննա Քելլին էլ հավելել է. «Այս պատերազմին վերջ տալու՝ նախագահի հստակ հրահանգների կատարումը գեներալ Քելլոգի միակ մտահոգությունն է»։
Քելլոգին մոտ կանգնած աղբյուրը հայտնել է, որ նա «հաճախ անմիջականորեն շփվում է նախագահի հետ», որի համար նա սկսել է աշխատել 2015 թվականին։
Բացի այդ, ինչպես նշում է աղբյուրը, Թրամփի վարչակազմում հենց Քելլոգն ունի լավագույն հարաբերությունները Ուկրաինայի նախագահ Վլադիմիր Զելենսկիի հետ։ Աղբյուրը հերքել է, որ Քելլոգին դուրս են մղում բանակցային գործընթացից և ենթադրել, որ դա «ներքին պայքար է Վաշինգտոնում»։
Թարգմանությունը՝ Էմմա Չոբանյանի
