24.06.2026 | 21:44
Հայաստանի մի շարք հասցեներում էլեկտրաէներգիայի անջատումներ կլինեն
Ռուսաստանը հրթիռային հարված է հասցրել Օդեսայի նավահանգստին․ զոհվել են բեռնատար նավի անձնակազմի 4 անդամներ
Քաղաքականություն
12.03.2025 | 12:07
Ռուսաստանը բալիստիկ հրթիռային հարված է հասցրել Օդեսայի նավահանգստին։ Հարվածի հետևանքով զոհվել են բեռնատար նավի անձնակազմի չորս անդամներ, որը հացահատիկի բեռով մեկնում էր Ալժիր։ Այս մասին հայտնել է Օդեսայի ռազմական վարչակազմին կից հասարակական խորհրդի նախագահ Սերգեյ Բրատչուկը՝ վկայակոչելով Ուկրաինայի նավահանգիստների վարչակազմի տվյալները։ Նրա խոսքով՝ հարվածն իրականացվել է մարտի 11-ին՝ տեղական ժամանակով 20:17-ին։
Ուկրաինայի համայնքների և տարածքների զարգացման նախարար Ալեքսեյ Կուլեբան հաստատել է հարվածը, և այն, որ չորս օտարերկրացիներ՝ Սիրիայի քաղաքացիներ, զոհվել են։
«Զոհերից ամենաերիտասարդը 18 տարեկան էր, ամենամեծը՝ 24»,- գրել է նա տելեգրամի իր ալիքում։
Բացի այդ, ըստ նրա, վիրավորվել է ևս երկու մարդ՝ ուկրաինացի և սիրիացի։
Ըստ տարբեր աղբյուրների՝ հարվածը հասցվել է կասետային մարտագլխիկով «Իսկանդեր-Մ» հրթիռով։
Բեռնատար MJ Pinar նավը եղել է Բարբադոսի դրոշի ներքո և շահագործվել է հունական ընկերության կողմից։ Հարձակման ժամանակ նավը գտնվել է Օդեսայի նավահանգստում, որի վրա եղել է 30 հազար տոննա հացահատիկ։ Անձնակազմի անդամների ընդհանուր թիվը 12 է։
Բացի բեռնատարից՝ վնասվել է նաև նավահանգստի ենթակառուցվածքը։
Միաժամանակ, մարտի 11-ի երեկոյան և լույս 12-ի գիշերը Ռուսաստանը հարվածներ է հասցրել Ուկրաինայի մի շարք քաղաքներին։
Թարգմանությունը՝ Էմմա Չոբանյանի
