09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Թրամփի բանագնացն այս շաբաթ կմեկնի Մոսկվա՝ Պուտինի հետ բանակցությունների
Քաղաքականություն
11.03.2025 | 12:16
Մերձավոր Արևելքի հարցերով ԱՄՆ նախագահի հատուկ բանագնաց Սթիվ Ուիթկոֆը ծրագրում է այս շաբաթվա վերջին մեկնել Մոսկվա՝ Ռուսաստանի նախագահ Վլադիմիր Պուտինի հետ բանակցությունների համար։ Այս մասին հայտնում է Axios-ը՝ վկայակոչելով իրավիճակին տեղյակ աղբյուրին։
Պուտինի հետ հանդիպումը նախատեսվում է անցկացնել երեքշաբթի Սաուդյան Արաբիայում ԱՄՆ-ի և ուկրաինացի պաշտոնյաների միջև առանցքային հանդիպումից մի քանի օր անց, որը կկենտրոնանա Ռուսաստանի հետ պատերազմի հնարավոր հրադադարի վրա։
Սա կլինի նրա երկրորդ հանդիպումը Պուտինի հետ։ Թրամփի բանագնացը փետրվարի կեսերին մեկնել էր Մոսկվա՝ ԱՄՆ քաղաքացի Մարկ Ֆոգելին ազատելու գործարքի շրջանակում, որն այն ժամանակ գտնվում էր ռուսական բանտում: Ուղևորության ընթացքում նա հանդիպել էր Պուտինի հետ։
Հինգշաբթի Ուիթկոֆը նախատեսում է մեկնել Մոսկվա, սակայն, ըստ իրազեկ աղբյուրի, ծրագիրը կարող է փոխվել՝ ելնելով Կատարում բանակցությունների հետ կապված իրավիճակից և Պուտինի ժամանակացույցից:
Երեքշաբթի երեկոյան նա կմեկնի Դոհա՝ միանալու Կատարի և Եգիպտոսի միջնորդներին Գազայի հատվածում պատանդառության և հրադադարի համաձայնագրի շուրջ բանակցությունների ընթացքում։ Չորեքշաբթի նախատեսվում է նրա հանդիպումը Կատարի վարչապետի հետ։
Թարգմանությունը՝ Էմմա Չոբանյանի
