Թուրքիան և արաբական մի շարք երկրներ դատապարտել են Դամասկոսի անվտանգությունը խաթարելու փորձերն ու Իսրայելի ագրեսիան

Հորդանանի կողմից կազմակերպված Սիրիայի և հարևան երկրների հանդիպումից հետո հայտարարվել է, որ բանակցությունների երկրորդ փուլը կկայանա ապրիլին Թուրքիայում։ Հորդանանի արտգործնախարարը հաստատել է, որ Թուրքիան կհյուրընկալի Սիրիայի և հարևան երկրների 2-րդ հանդիպումը, ինչպես նշված է հավաքից հետո հրապարակված համատեղ հայտարարության մեջ, գրում է Turkiye Today-ը։

Հանդիպմանը մասնակցել են հինգ երկրների արտաքին գործերի, պաշտպանության նախարարները, ԶՈՒ շտաբների պետերը և հետախուզության տնօրենները: Քննարկման հիմնական թեմաներն են եղել հակաահաբեկչությունը, սահմանային անվտանգությունը, թմրանյութերի և զենքի մաքսանենգության կանխումը և ավելի լայն տարածաշրջանային խնդիրների լուծումը:

Թուրքիայի, Հորդանանի, Իրաքի, Լիբանանի և Սիրիայի համատեղ հայտարարության մեջ դատապարտվել են Սիրիայի անվտանգությունը խաթարելու բոլոր փորձերը, աջակցություն է հայտնվել նրա կառավարությանը։ Հայտարարության մեջ նշվում են մի քանի կարևոր կետեր, մասնավորապես, կողմերն աջակցում են  ապահով և կայուն հիմքերի վրա Սիրիայի վերականգնման ջանքերին, դատապարտում են Սիրիայի ինքնիշխանությունն ու անվտանգությունը խաթարելու ցանկացած փորձ, մերժում են իսրայելական ագրեսիան Սիրիայի տարածքի դեմ և կոչ են անում վերջ տալ Իսրայելի խախտումներին, ողջունում են Սիրիայի ազգային երկխոսության համաժողովի արդյունքները, ստեղծվում է ահաբեկչության դեմ պայքարի և ԻԼԻՊ-ի դեմ միջազգային ջանքերին աջակցելու համար համատեղ օպերատիվ կենտրոն, համակարգվում են թմրամիջոցների և զենքի մաքսանենգության ու կազմակերպված հանցավորության դեմ պայքարի ջանքերը, միբիլիզացվում է միջազգային աջակցությունը Սիրիայի վերականգնմանը, ընդգծվում է Սիրիայի նկատմամբ պատժամիջոցների վերացման անհրաժեշտությունը, ընդլայնվում է տարածաշրջանում տնտեսական, առևտրային և ներդրումային համագործակցությունը, միջազգային իրավունքին համապատասխան պայմաններ են ստեղծվում սիրիացի փախստականների անվտանգ վերադարձի համար:

Հավաքի մասնակիցները նաև ընդգծել են շարունակական համագործակցության կարևորությունը և վերահաստատել իրենց հանձնառությունը պահպանել միջազգային իրավունքը, աջակցել սիրիացի ժողովրդին և աշխատել խաղաղության ու կայունության ուղղությամբ:

Թարգմանությունը՝ Էմմա Չոբանյանի