ՄԱԿ-ի Մարդու իրավունքների հանձնակատարը կոչ է անում անհապաղ դադարեցնել Սիրիայում խաղաղ բնակիչների սպանությունները․ ՌԴ-ն և ԱՄՆ-ն ՄԱԿ-ի ԱԽ խորհրդակցություն են խնդրել

Սիրիայի հյուսիս-արևմուտքում՝ ափամերձ շրջաններում խաղաղ բնակիչների սպանությունները պետք է անհապաղ դադարեցվեն։ Այս մասին ասվում է ՄԱԿ-ի Մարդու իրավունքների գերագույն հանձնակատար Վոլկեր Տյուրկի հայտարարության մեջ։

«Նախկին կառավարության տարրերի և տեղացի այլ զինված մարդկանց կողմից իրականացված մի շարք համակարգված հարձակումներից հետո մենք ծայրահեղ անհանգստացնող հաղորդումներ ենք ստանում ամբողջական ընտանիքների, այդ թվում՝ կանանց, երեխաների և մարտական ​​գործողությունների մասնակից զինյալների սպանության մասին: Կան հաղորդագրություններ կրոնական հողի վրա արտադատական ​​մահապատիժների մասին, որոնք կատարվել են անհայտ անձանց, ժամանակավոր իշխանությունների անվտանգության ուժերի անդամների և նախկին կառավարության հետ առնչվող տարրերի կողմից»,- ասվում է հայտարարության մեջ։

Տյուրկը նշում է, որ օրենքը հարգելու մտադրության մասին ժամանակավոր իշխանությունների հայտարարություններին պետք է հետևեն սիրիացիներին պաշտպանելու արագ գործողություններ, այդ թվում՝ ձեռնարկելով բոլոր անհրաժեշտ միջոցները՝ կանխելու ցանկացած խախտում և չարաշահում ու պատասխանատվության ենթարկել, երբ դրանք տեղի են ունենում:

«Բոլոր սպանությունների և այլ խախտումների վերաբերյալ պետք է լինի արագ, թափանցիկ և անաչառ հետաքննություն, մեղավորները պետք է պատասխանատվության ենթարկվեն՝ միջազգային իրավունքի նորմերին և չափանիշներին համապատասխան: Քաղաքացիներին ահաբեկող խմբերը նույնպես պետք է պատասխանատվության ենթարկվեն։ Այս իրադարձությունները, ինչպես նաև ատելության խոսքի շարունակական աճը ևս մեկ անգամ ցույց են տալիս համապարփակ անցումային արդարադատության գործընթացի հրատապ անհրաժեշտությունը, որը կլինի ազգային սեփականություն, ներառական և կենտրոնացած ճշմարտության, արդարության և հաշվետվողականության վրա»,- հայտարարում է ՄԱԿ-ի Մարդու իրավունքների հանձնակատարը։

Միաժամանակ, ՌԴ-ն և ԱՄՆ-ն էլ մարտի 10-ին ՄԱԿ-ի Անվտանգության խորհրդի արտակարգ խորհրդակցություն են խնդրել՝ կապված Արևմտյան Սիրիայում խաղաղ բնակիչների նկատմամբ բռնությունների հետ։ Այս մասին հայտնել է ՄԱԿ-ում ՌԴ մշտական ​​ներկայացուցչի առաջին տեղակալ Դմիտրի Պոլյանսկին։ Խորհրդակցությունները նախատեսվում է անցկացնել մարտի 10-ին։

Հավելենք, որ Սիրիայի նախագահականը կիրակի հայտարարել էր յոթ անդամից բաղկացած «անկախ կոմիտե» ստեղծելու մասին, որը կհետաքննի վերջին բռնությունները երկրի միջերկրածովյան ափին: Կոմիտեին հանձնարարվել է հետաքննել քաղաքացիական անձանց նկատմամբ խախտումները և բացահայտել բռնության համար պատասխանատուներին:

Բացի այդ, կոմիտեն իրավասու է բոլորին հարցաքննել և պարտավոր է հաշվետվություն կազմել 30 օրվա ընթացքում: Հայտարարության մեջ նաև ընդգծվում է, որ մեղավոր ճանաչված անձինք կփոխանցվեն դատարանին։

Հիշեցնենք՝ մարտի 7-ին սիրիական Լաթաքիա և Տարտուս նահանգներում՝ Միջերկրական ծովի ափին,  երկրի տապալված նախագահ Բաշար Ասադի կողմնակիցների և կառավարական ուժերի միջև բախումներ են սկսվել։ Սիրիայի անցումային իշխանությունները կոշտ ճնշումներով են պատասխանել։ Ավելի քան երկու օր շարունակվող բախումների հետևանքով զոհվել է առնվազն հազար մարդ։

Թարգմանությունը՝ Էմմա Չոբանյանի