25.05.2026 | 14:16
«Սպարտակի» ֆուտբոլիստը կոտրել է Ռուսաստանի գավաթը․ ՏԵՍԱՆՅՈՒԹ
Թրամփը հայտարարել է, որ ԱՄՆ-ը մոտ է Ուկրաինայի հետ հետախուզական տվյալների փոխանակումը վերսկսելուն
Քաղաքականություն
10.03.2025 | 11:36
ԱՄՆ նախագահ Դոնալդ Թրամփը հայտարարել է, որ Վաշինգտոնը մոտ է Ուկրաինայի հետ հետախուզական տվյալների փոխանակումը վերսկսելուն, գրում է Axios-ը։
Տվյալների փոխանակման դադարը, որը հիմնականում ուղղված էր Ռուսաստանի դեմ հարձակողական գործողությունների հետախուզական տվյալների փոխանակմանը, զգալի դժվարություններ է ստեղծել ուկրաինացի զինվորականների համար: Նախագահական ինքնաթիռում լրագրողը Թրամփին հարցրել է՝ արդյո՞ք նա կքննարկի Ուկրաինայի հետ հետախուզության տվյալների փոխանակման արգելափակումը վերացնելու հարցը:
«Մենք գրեթե արել ենք դա»,- պատասխանել է Թրամփը։
Նա նշել է, որ կարծում է՝ Ուկրաինան կստորագրի ԱՄՆ-ի հետ օգտակար հանածոների վերաբերյալ համաձայնագիր, սակայն շեշտել է, որ ցանկանում է՝ Ուկրաինան «խաղաղություն ցանկանա, և առայժմ նրանք դա ցույց չեն տվել այնքանով, որքանով պետք է»։
«Բայց ես կարծում եմ, որ նրանք կանեն դա, և ես կարծում եմ, որ դա ակնհայտ կդառնա առաջիկա երկու-երեք օրվա ընթացքում»,- ասել է ԱՄՆ նախագահը։
Նրա խոսքերը հնչում են երեքշաբթի Սաուդյան Արաբիայում ԱՄՆ-ի և Ուկրաինայի բարձրաստիճան պաշտոնյաների միջև նախատեսված առանցքային հանդիպումից առաջ, որը կկենտրոնանա եռամյա պատերազմում հնարավոր հրադադարի վրա:
Թրամփը նշել է, որ հույս ունի այս շաբաթ առաջընթաց գրանցել այդ հարցում և ընդգծել՝ կարծում է, որ Սաուդյան Արաբիայում հանդիպումը լավ արդյունքներ կտա։ Նա, սակայն, չի ասել՝ արդյո՞ք ԱՄՆ-ը կվերացնի Ուկրաինա զենքի մատակարարման կասեցումը, որը սահմանվել էր մեկ շաբաթ առաջ։
Թարգմանությունը՝ Էմմա Չոբանյանի
