16.12.2025 | 10:41
ՀՀ մարզերում ապօրինի ջրօգտագործումներ են կասեցվել. ԲԸՏՄ
Հրաշքի սպասման 25 տարիները. Եղիազարյան ընտանիքում առաջին մանկան ճիչը լսվեց․ ՏԵՍԱՆՅՈՒԹ
08.03.2025 | 20:00
Գարնան առաջին օրը Եղիազարյանների ընտանիքում լույս ծագեց. 25 տարվա սպասումից հետո ծնվեց Լուսե Եղիազարյանը, ընտանիքի առաջին զավակը։ 2600 գրամ քաշով ծնված փոքրիկի անունը պատահական չէ ընտրված։
43-ամյա Ծովիկ Սարգսյանը և 49-ամյա Գևորգ Եղիազարյանը 25 տարի տարբեր բուժհաստատությունների ու բժիշկների դռներ են թակել, բժշկական տարբեր միջամտություններ կատարել, մինչև հուսահատված որոշել են դիմել փոխնակ մոր օգնությանը։ Հենց այս միտքն է նրանց բերել Մարգարյան ծննդատուն։
Մանկաբարձ գինեկոլոգ Արմինե Սայադյանը հիշում է, թե ինչպես ամիսներ առաջ Եղիազարյան ամուսինները մտան իր սենյակ լիովին հուսահատված, դժկամորեն էին տրամադրված փորձելու ամենավերջին տարբերակը։ Կրկին հույսով լցված ընտանիքի համար բաղձալի լուրը երկար սպասել չտվեց։
Աշտարակի մարզի Ոսկեվազ գյուղում բոլորն էին սպասում Լուսեի ծննդին։ 43 տարեկանը գինեկոլոգիայի տեսանկյունից ռիսկային է համարվում։ Բժիշկ Սայադյանը, սակայն, նշում է, Ծովիկի հղիությունը թեթև է ընթացել։
Ծովիկը, չկարողանալով զսպել արցունքները, պատմում է՝ առաջին անգամ բալիկին տեսնելն ամենահրաշալի զգացողությունն է։
Թեև մոր և երեխայի առաջին հանդիպմանն ականատես լինելը բժիշկ Սայադյանի համար պետք է որ սովորական դարձած լիներ, սակայն գինեկոլոգն ընդգծում է՝ յուրաքանչյուր հանդիպում յուրովի աննկարագրելի է, առավել ևս, երբ այդ հանդիպումը մի քանի տասնյակ տարի է ձգվել։
Երկար ու ձիգ 25 տարիների դժվարին պայքարն այսօր չեն ուզում հիշել։ Ծովիկը իրենց նման ընտանիքներին հորդորում է՝ երբեք չկորցնել հույսը։
Գևորգն էլ չի մոռանում շնորհակալական խոսքերն ուղղել սկզբում Աստծուն, ապա՝ բժիշկներին։
Եվ մինչ նորաթուխ ծնողները հիշում էին իրենց ապրումները, ծննդատան շենքի մոտ Ծովիկին, Գևորգին ու Լուսեին սպասում են ոչ պակաս հուզված հարազատները։ Արդեն րոպեներ անց Եղիազարյան ընտանիքը հրաժեշտ է տալիս հարազատ դարձած հաստատությանը և իրենց սիրելի բժշկին, վստահեցնելով՝ դեռ վերադառնալու են․ ուզում են Լուսեն քույրիկ կամ եղբայր ունենա։
Մանրամասները՝ տեսանյութում։
Ռոզա Վարդանյան
