08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Հաջորդ շաբաթ Սաուդյան Արաբիայում տեղի կունենա ԱՄՆ-ի և Ուկրաինայի ներկայացուցիչների հանդիպումը
Քաղաքականություն
07.03.2025 | 11:03
Ուկրաինայի նախագահ Վլադիմիր Զելենսկին հայտնել է ԱՄՆ-ի և Ուկրաինայի պատվիրակությունների միջև առաջիկա շաբաթ տեղի ունենալիք հանդիպման մասին։
«Ուկրաինական և ամերիկյան թիմերը վերսկսել են աշխատանքը, և հուսով ենք, որ հաջորդ շաբաթ բովանդակալից հանդիպում կունենանք»,- գրել է նա X-ի իր միկրոբլոգում, միաժամանակ, շնորհակալություն հայտնել Եվրոպային՝ Կիևին ցուցաբերած աջակցության համար։
Տելեգրամում էլ Զելենսկին հայտնել է, որ ամերիկյան կողմի հետ հանդիպումը տեղի է ունենալու Սաուդյան Արաբիայում։
«Հաջորդ երկուշաբթի նախատեսված է իմ այցը Սաուդյան Արաբիա՝ թագաժառանգի հետ հանդիպման։ Դրանից հետո իմ թիմը կմնա Սաուդյան Արաբիայում՝ աշխատելու ամերիկացի գործընկերների հետ։ Ուկրաինան ամենից շատ է շահագրգռված խաղաղությամբ։ Ինչպես մենք ասել ենք նախագահ Թրամփին՝ Ուկրաինան աշխատում է և կաշխատի բացառապես կառուցողական՝ արագ և հուսալի խաղաղության համար»,- նշել է Ուկրաինայի նախագահը։
Fox News-ի Սպիտակ տան թղթակից Ջեքի Հենրիխը նույնպես հայտնել է, որ բանակցությունները կսկսվեն մարտի 11-ին Սաուդյան Արաբիայի մայրաքաղաք Էր Ռիադում։ Նա նշել է, որ ԱՄՆ-ից բանակցություններին մասնակցելու են պետքարտուղար Մարկո Ռուբիոն, ԱՄՆ ազգային անվտանգության հարցերով խորհրդական Մայք Ուոլցը և Մերձավոր Արևելքում Դոնալդ Թրամփի հատուկ բանագնաց Սթիվ Ուիթկոֆը։ Ուկրաինայից բանակցություններին կմասնակցի նախագահի գրասենյակի ղեկավար Անդրեյ Երմակը։
Հիշեցնենք, որ ավելի վաղ Երմակը հայտարարել էր, որ հեռախոսազրույց է ունեցել Ուոլցի հետ, և որ ԱՄՆ-ի ու Ուկրաինայի ներկայացուցիչներն առաջիկայում հանդիպելու են։
Թարգմանությունը՝ Էմմա Չոբանյանի
