03.04.2026 | 10:42
Իրանը հայտարարել է, որ խոցել է ամերիկյան երկրորդ F-35 կործանիչը
Փաշինյանի հասցեին բռնության կոչեր հնչեցնելու մեջ մեղադրվող Հրանտ Բագրատյանն արդարացվեց
Հասարակություն
06.03.2025 | 20:14
Վարչապետ Նիկոլ Փաշինյանի հասցեին բռնության կոչեր հնչեցնելու մեղադրանքով 2023 թվականից դատարանի առաջ կանգնած ՀՀ նախկին վարչապետ Հրանտ Բագրատյանն արդարացվեց։
Երևան քաղաքի ընդհանուր իրավասության դատարանը, դատավոր Մանվել Շահվերդյանի նախագահությամբ, քիչ առաջ արդարացման վերդիկտ կայացրեց. «Վերջնական դատական ակտ այս պահին դեռևս չունենք, ընդամենն ունենք վերդիկտ, հայտնի չէ, թե բռնության կոչ որակված արտահայտությունը ինչպես է մեկնաբանել դատարանը։
Բայց փաստ է, որ մեղադրանքը չի հիմնավորվել»,- FactorTV-ի հետ զրույցում ասաց Բագրատյանի պաշտպան Հովհաննես Քոչարյանը։
Հիշեցնենք՝ ըստ մեղադրանքի, Հրանտ Բագրատյանը 2023 թվականի ապրիլի 4-ին՝ ժամը 16:30-ից 18:00-ն, Ազգային ժողովի մուտքի դարպասների մոտ «Միասին հասարակական շարժում» կազմակերպության հավաքի ժամանակ բարձրացել է ելույթի հարթակ ծառայող ավտոքարշակի թափքի վրա և բարձրախոսով՝ հրապարակային եղանակով, որը լուսաբանվել է տարբեր լրատվամիջոցներով և ինտերնետային կայքերով, հետևաբար հասու է դարձել հասարակության լայն շրջանակի, քաղաքական հայացքներով պայմանավորված, այն է՝ ՀՀ վարչապետ Նիկոլ Փաշինյանի վարած արտաքին և ներքին քաղաքականության արդյունքում Հայաստանի Հանրապետությունում ստեղծված անվտանգային և տնտեսական վիճակի մեջ մեղադրելով վերջինիս, դիտավորությամբ հնչեցրել է բռնություն գործադրելու կոչեր։
Մասնավորապես, խոսելով ՀՀ վարչապետ Նիկոլ Փաշինյանի մասին, ասել է. «Արա, ինչի՞ եք մեռնում, վերացրեք էդ մարդուն, վերջացրեք արա, վերացրեք էդ իշխանությունը ձեր ուժով, ձեր թափով»։ Բագրատյանն առաջադրված մեղադրանքը չէր ընդունում։
Ռոզա Վարդանյան
