25.05.2026 | 14:23
Երևան-Բաթումի-Երևան չվերթներ են գործարկվել
Երկքաղաքացի հանդիսացող ՀՀ քաղաքացիներին ՀՀ ազգային վարորդական վկայական կտրամադրվի
06.03.2025 | 17:03
Երկքաղաքացի հանդիսացող ՀՀ քաղաքացիներին կտրամադրվի ազգային վարորդական վկայական, եթե այլ պետություններում ստացել են 1968 թվականի նոյեմբերի 8-ի «Ճանապարհային երթևեկության մասին» կոնվենցիայի պահանջներին համապատասխանող վարորդական վկայականներ։ Որոշումն ընդունվեց Կառավարության այսօրվա նիստում՝ չզեկուցվող հարցերի փաթեթով:
Նախագիծը մշակել և Կառավարության քննարկմանն էր ներկայացրել ՀՀ Ներքին գործերի նախարարությունը։ Ըստ հիմնավորման՝ «Ճանապարհային երթևեկության անվտանգության ապահովման մասին» օրենքի համաձայն՝ երկքաղաքացի հանդիսացող ՀՀ քաղաքացիների` այլ երկրներում ստացած և 1968 թվականի «Ճանապարհային երթևեկության մասին» Վիեննայի կոնվենցիայով ներկայացվող պահանջներին համապատասխանող վարորդական վկայականների հիման վրա ՀՀ ազգային վարորդական վկայական տրվում է առանց որակավորման քննություններ հանձնելու, սակայն դրա կարգավորումները, կիրարկումը բացակայում են։
Ավելին, Վարչական իրավախախտումների վերաբերյալ ՀՀ օրենսգրքը պատասխանատվություն է սահմանում ՀՀ քաղաքացու կողմից այլ երկրի վարորդական վկայականով տրանսպորտային միջոց վարելու համար։ Սակայն ՀՀ բազմաթիվ քաղաքացիներ, ովքեր միաժամանակ հանդիսանում են այլ երկրի քաղաքացի, այցելում են ՀՀ և ՀՀ-ում վարում են տրանսպորտային միջոց իրենց քաղաքացիության մյուս երկրի կողմից տրված վարորդական վկայականով։
Նման կարգավորումը զրկում է վերը նշված կարգավիճակում գտնվող ՀՀ քաղաքացիներին, ունենալով սահմանված կարգով ստացված և միջազգային իրավական ակտերին համապատասխանող վարորդական վկայական, ՀՀ-ում տրանսպորտային միջոց վարելու հնարավորությունից, այդ թվում՝ զրկելով վերջիններիս իրենց տրանսպորտային միջոցները վարելով ՀՀ այցելելու հնարավորությունից։
Նախագծի ընդունմամբ, ըստ ՆԳՆ-ի, կկարգավորվի ազգային վկայականների տրամադրման գործընթացը:
