25.05.2026 | 16:00
Տղամարդավարի ներողություն խնդրիր Օսիպյանից. Տիգրան Պետրոսյանը դիմեց Փաշինյանին․ ՏԵՍԱՆՅՈՒԹ
ԵՄ-ն պաշտպանության համար մոբիլիզացնում է 800 մլրդ եվրո․ Ուրսուլա ֆոն դեր Լեյեն
Քաղաքականություն
04.03.2025 | 16:05
Մենք ապրում ենք ամենակարևոր և վտանգավոր ժամանակներում: Ես կարիք չունեմ նկարագրելու այն սպառնալիքների ծանր բնույթը, որոնց մենք բախվում ենք, կամ կործանարար հետևանքները, որոնք ստիպված կլինենք դիմանալ, եթե այդ սպառնալիքները իրականանան։ Մեր առջև դրված իրական հարցն այն է՝ արդյո՞ք Եվրոպան պատրաստ է գործել այնքան վճռական, որքան իրավիճակը թելադրում է: Եվ արդյո՞ք Եվրոպան պատրաստ և ի վիճակի է գործել այն արագությամբ ու հավակնությամբ, որն անհրաժեշտ է։ Այս մասին ասվում է Եվրահանձնաժողովի ղեկավար Ուրսուլա ֆոն դեր Լեյենի ՝ պաշտպանական փաթեթի վերաբերյալ հայտարարության մեջ։
«Մենք վերազինման դարաշրջանում ենք։ Իսկ Եվրոպան պատրաստ է զգալիորեն մեծացնել պաշտպանական ծախսերը»,- նշել է նա։
Եվրահանձնաժողովի ղեկավարն ընդգծել է, որ առաջնորդներին ուղղված այս նամակում ուրվագծել է «Rearm Europe Plan»-ը: Առաջարկների փաթեթը կենտրոնանում է այն բանի վրա, թե ինչպես օգտագործել տրամադրության տակ եղած բոլոր ֆինանսական լծակները, որպեսզի օգնեն անդամ պետություններին արագ և զգալիորեն մեծացնել պաշտպանական կարողությունների ավելացմանն ուղղված ծախսերը:
Առաջարկների փաթեթը բաղկացած է հինգ մասից։ Առաջինը ազգային մակարդակով պաշտպանության ոլորտում պետական ֆինանսավորման օգտագործման մեծացումն է։ ԵՄ անդամ երկրները պատրաստ են ավելի շատ ներդրումներ կատարել սեփական անվտանգության համար, եթե ունեն ֆիսկալ տարածք:
Երկրորդ առաջարկը նոր գործիք է լինելու․ այն անդամ երկրներին կտրամադրի 150 միլիարդ եվրոյի վարկեր՝ պաշտպանական ոլորտում ներդրումների համար: Հիմնականում խոսքն ավելի արդյունավետ գումար ծախսելու և միասին գումար ծախսելու, հնարավորությունների համաեվրոպական ոլորտների մասին է։
Երրորդը վերաբերում է ԵՄ բյուջեի ուժի օգտագործմանը: Գործողությունների վերջին երկու ուղղությունները նպատակ ունեն մոբիլիզացնել մասնավոր կապիտալը՝ Խնայողական և ներդրումային միության գործունեության ու Եվրոպական ներդրումային բանկի միջոցով:
«Եվրոպան պատրաստ է ստանձնել իր պարտականությունները։ «ReArm Europe»-ը կարող է մոտ 800 միլիարդ եվրո մոբիլիզացնել անվտանգ և դիմակայուն Եվրոպայի համար: Մենք կշարունակենք սերտորեն համագործակցել ՆԱՏՕ-ի մեր գործընկերների հետ։ Սա պահ է Եվրոպայի համար, և մենք պատրաստ ենք առաջ գնալ»,- հայտարարել է Եվրահանձնաժողովի ղեկավարը։
Թարգմանությունը՝ Էմմա Չոբանյանի
