08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Չինաստանը հավելյալ մաքսատուրքեր է սահմանել ամերիկյան ապրանքների համար՝ ի պատասխան ԱՄՆ-ի մաքսատուրքերի կրկնապատկման
Քաղաքականություն
04.03.2025 | 13:41
Չինաստանը 10-15% հավելյալ մաքսատուրքեր է սահմանել ամերիկյան գյուղատնտեսական ապրանքների համար, ինչպես նաև 15 ամերիկյան ընկերությունների ավելացրել է արտահանման վերահսկման ցուցակում՝ ի պատասխան չինական ապրանքների համար ԱՄՆ մաքսատուրքերի կրկնապատկման։ Այս մասին հաղորդում է ՉԺՀ Ֆինանսների նախարարությունը, գրում է Current time-ը։
Հավելյալ տուրքերն ուժի մեջ են մտնելու 2025 թվականի մարտի 10-ից։
15% մաքսատուրքը տարածվելու է հավի, ցորենի, եգիպտացորենի և բամբակի, 10%-ը՝ սորգոյի, սոյայի, խոզի, տավարի, ծովամթերքի, մրգերի, բանջարեղենի և կաթնամթերքի վրա։
Ավելի վաղ Չինաստանի Առևտրի նախարարությունը «խիստ դժգոհություն և վճռական հակազդեցություն» էր հայտնել ԱՄՆ-ի գործողություններին։ Գերատեսչության հայտարարության մեջ նշվում է, որ ԱՄՆ-ի միակողմանի մաքսատուրքերը կարող են վնասել Չինաստանի և ԱՄՆ-ի միջև առևտրատնտեսական հարաբերություններին:
Հավելենք, որ մարտի 4-ից ուժի մեջ են մտել Չինաստանից, Մեքսիկայից և Կանադայից ապրանքների ներմուծման ԱՄՆ բարձրացված մաքսատուրքերը։
Ավելի վաղ ԱՄՆ նախագահ Դոնալդ Թրամփը գործադիր հրաման էր ստորագրել չինական ապրանքների ներմուծման դրույքաչափը 10-ից 20 տոկոս բարձրացնելու մասին։
Թարգմանությունը՝ Էմմա Չոբանյանի
