Կիևը հաստատել է Դնեպրոպետրովսկի զորավարժարանին ռուսական հարվածի լուրը․ զոհեր կան

Ուկրաինայի Զինված ուժերի ցամաքային զորքերի հրամանատար Միխայլո Դրապատին ընդունել է զորավարժարանում ուկրաինացի զինվորների զանգվածային մահվան փաստը, ինչի մասին նախօրեին հայտնել էին ռազմական դիտորդները, գրում է BBC-ի ռուսական ծառայությունը։

«Զորավարժարանում տեղի ունեցած ողբերգությունը հակառակորդի հարձակման սարսափելի հետևանք է։ Պատերազմը պահանջում է արագ որոշումներ, պատասխանատվություն և անվտանգության նոր չափանիշներ, հակառակ դեպքում, մենք կորցնում ենք ավելին, քան ունենք»,- ասել է նա`նշելով, որ ողբերգության հանգամանքների հետաքննությունը շարունակվում է, ինքն անձամբ հետևում է ամեն քայլի։

Դրապատին զոհերի և վիրավորների կոնկրետ թիվ չի նշել։ Նա հայտնել է, որ հրամայել է անկախ հետաքննություն անցկացնել ռազմական հակահետախուզության մասնակցությամբ, «որպեսզի ոչ մի դետալ աննկատ չմնա, իսկ մեղավորները չկարողանան խուսափել պատասխանատվությունից»։

Նախօրեին ուկրաինացի զինվորական դիտորդները հայտնել էին, որ մարտի 1-ին ռուսական ռազմական ուժերը «Իսկանդեր-Մ»-ով հարվածել են Դնեպրոպետրովսկի մարզի Սամար քաղաքի մոտ գտնվող զինծառայողների պատրաստման կենտրոնին։ Տարբեր աղբյուրների համաձայն՝ տասնյակ մարդիկ կարող էին զոհվել, հարյուրավորները՝ վիրավորվել։

ՌԴ ՊՆ-ն շաբաթ հայտնել էր, որ «Իսկանդեր-Մ»-ով հարված է հասցրել Դնեպրոպետրովսկի մարզի Նովոմոսկովսկ զորավարժարանին, որտեղ պատրաստություն էին անցնում Ուկրաինայի ԶՈւ 157-րդ բրիգադի զինծառայողները։

Թարգմանությունը՝ Էմմա Չոբանյանի